Buaipui tham Zu
Tun hma deuh khan damdawi hmansual (drugs overdose) avanga thi mizo thalai kan thahnem viau thin a, Vengtin khawtinin kan buaipui luih luih mai zawng anih kha. YMA in kumpuanah ‘Ruihhlo Do’ hial apuanga, ziaawm lam kan pan ta deuh. Kumpuanah em hman nilo mahsela tha thlah dul chi anilo tih hriaiin Central Anti-Drugs Squad (CADS) din chhunzawm nghal a ni. Heng hmalakna hrang hrang vangte pawh a ni ang damdawi hmansual vanga thihna hi a tlemta sawt a tih theih awm e. Zofate tan thaw khat chu a veng tan e tih mek laiin zu khap burna dan hnuaia awm reng chung siin hun reilote chhung hian zu leh a kaihhnawih vanga thi kan pung chho dawrh thung. Veng tinah thalai leh pavalai tak tak thi hriattur a awm fo mai hian ngaihtuah a ti thui a, ngaihdan hrang hrang pawh a siam tam hle a ni.
Zu hian mizo nunah hian pawimawhna tak a nei ni awm tak a ni. Hmanlai kan pi leh pute atang tawhin zu hian hmun pawimawh tak a luahfo thin a, amaherawhchu awmze nei tak leh dan fel tak neia in a ni thin. Zu in nasa ber chu lal leh upate an ni a, nilengin an in a ni ber. Paho hian chhiatni thatniah a huhovin an in a, naupang in an in ngailo. Nula leh tlangval pawhin kut ni, chawngchen leh khuangchawi ang chi, hun bikah chauh an in thin. Hun a in her danglam zel a, tun hunah chuan thalaite hi zu in, buaipui ngai bera te chu kan ni tlat tawh thung.
Pathian huatzawng tak, mihring hmelma anih thu te, sual lo intanna anih thu thlengin kan sawi chamchi a. Zu in lo turin nasa takin kan inzirtir a, kan inhrilh chamchi bawk. Kristian ramah hian tun thleng hian zu khap burna hnuaiah dan kengkawhtute mai bakah mi thahnem ngai ten tihrem tumin theihtawp an chhuah nachungin rem a hnekin thihpui kan pung tual tual niin a lang bawk si, a buaithlak hle a ni.
Zu hi hmanlai atang tawh a tun thlenga kan la ban theihloh avang hian sual a nilo chuang silo. Hnam changkang zawk ten an chelek em avang ngawt hian a tha ta tihna pawh a ni chuang bawk hek lo. Pathianin chhia leh tha hriatna min pek tibuai a, ti khawlo theitu anih tlat avang hian sual tihloh rual chi chu a nilo. Mizo zingah hian zu in dan chin tawk hria leh damdawi a hmang thiam hi chhiar tham pawh kan awm ngut lovang.
A sawimawi tute’n zu khapna hi hlip ila, zu tha tam sela, hei ai chuan kan zia deuh vang an ti thin. Zu khapna hi hlip ta ila tunai hian zu in kan pungin buaina a pung sawt anga, zurui an ngampa sawt bawk ngei ang. Chu chuan chhiatna thuk zawkah min hnuk lut ngeiin a rinawm. Khap bur anih chung pawhin kan buan hnehlo lek lek zawng anih si hi. Zu tlemte in a, chhia leh tha hriatna khawih buailo tawk lek a in chu taksa tan a tha e tih a ni. Mahse, info na na na chuan tlemte inreng chu thil theihloh hulhual a ni si. Chuvangin, Zu in dan tawk thiam a har a, insum theihna min hloh tir tu, Pathian min pek chhia leh tha hriatna khawihbuai thei thil anih avang hian tem loh hrim hrim hi himna ber a ni.
