YMA LEH SPORTS
- MARYMA editorial, 03.04.2011
Kumtin hian Central YMA hian Sports hi a buatsaih thina. Tunah pawh hian Mizo infiamna chi hrang hrang bakah Cricket-te a intihsiakna a buatsaih leh meka, keini branch pawhin sports sub-committee dinin heng infiamna chi hrang hrangah hian a theih anga tam kan chhuak ani.
Mi tamtak ngaihdanah chuan YMA in Sports a buatsaih thin hi a hautak dan ngaihtuahin a tul vak awm lo ve. A ni reng lah taka, Cricket bat pakhat man pawh cheng sing dawn a lo ni a, thil dang man neuh neuh nena belhkhawm phei chuan vawikhat tournament-ah hian cheng singhnih singthum lai a ngai thin ani. Sum hmuhna leh inhlawhna van dan ngaihtuah chuan uihawm tham a tling reng ani. Cricket mai bakah infiamna Item chi hrang hrang a la tama, vanneih phei chuan kan thleng sang tulh tulha, senso a tam tulh tulh leh nghal. Intihpalh theih a ni a, vanduai phei chuan hliampui tawrh theih a la ni leh nghal.
Engvangin nge CYMA hian kumtin hian branch inelna hrang hrang hi a siam ziaha, branch hrang hrang ten kan sum senral tam tur zia hre reng si a a la kalpui reng si. Kan branch pawhin tel loh chu sawi loh, a uar pawlah tanga, item tina kan la tel ziah. A bul belah chuan sports hi min tihrisel tu leh ruihhlo dona tha ber ani tiin a sawi theih awm e. Hna hmu lo tur a kan ngaih tam takin sports a theih avangin an hmuh phaha, dinhmun sang tak takah an din theih phaha, kan thalai thaza rual tam takin sual lam hawisana, inelna thianghlim an luhchilh theih nan a tangkai em em ani. Dik taka sawi chuan Aizawla mi inluah tan chuan eizawnna ni lem lo, hna dang zingkar leh tlai lama han thawh tur hi a vang em em a, tihtur neih lohin a hrin chhuah chu ruihhlo bawiha luh ani. Chu awm mai mai hri tih rehna tha ber chu sports hi a tih theih awm e. Heti tak hian sports hi uar lo phei ila kan thalai engzat tak hi nge ruihhlo bawihah lut ang tih hi sawi ngam pawh a ni lo hial awm e.
Henghi hriain CYMA chuan ruihhlo dona thaber sports hi a theih tawpin a uar ta a, miin ruihhlo ngawl a vei tawh chuan a tihdam leh hautak zia leh sumsen pawh a let tam a nihzia hriain a danna lamah hian hma a la ta ani. Tuna sum tlem kan sen hian kan tu leh fate nun kan khalhngil thei a, nunna tamtak kan hum zawk a tihtheih awm e.
Khawvel pawhin infiammite hi a ngaisanga, eng infiamna-ah pawh a ber kaipha chinte hi chu mi ngaihsan leh zahkai an ni thin. Nu leh pate pawh hian kan fate thiltih khapsak fo ai chuan an tihtur leh tui zawng ngaihtuahpuia, an kalna awm zawnpui hi a finthlak fo. Awm awl hi mihring hmelma lian, a tha lam aia a thalo lama min hruaitu, Setana hmanraw tha tak a ni.
