Committee leh pawl

- MARYMA Editorial, 25.06.2011

Mizo te hi committee hnam tihiala sawi theih kan ni a, kum khat chhunga kan tawngkam chhuak chawhrual tam berte zingah ‘committee’ tihhi a tel pha hial mai thei a ni.

Chumi awmzia chu kan society hi a la darhsarh lova, mipuite pawh a khawm tel telin kan la khawsa a, chu chuan chet vel leh thil ruahman a tiawlsam a ni.

Pawl hi kan ngai pawimawh a, pawl ngaih pawimawhna hi tun hnai mai nilo Zawlbuk ken kha niin a lang. A huhova huaisenna, intihphur tawnna nasa tak kan nei thei thin.

Mi tha leh tha lo kan tehna pawh hi pawla a chet dan a zir a ni tlangpui a, pawla inhmang tak, hman tak si hi chuan midang sawisel an awlsam bik thin hle bawk.

Globalization khawvel kan sawi tawh lai hian pawla inhman ral thak hi thil awm thei a ni. Chutih rualin kan ‘productive’ em tih pawh hi chhut tel ngai tak a ni. Chhungte thawh ring, thawh tak tak nei silo hian pawlah a kul ataia kan inhmang a nih chuan sual lianpui a nihna chen a awm.

Hmasawn tura beih nasat ngaihna leh miang pangngai ni tura thawh nasa ngaihna hi kan hmaih fo tin. Hun a kal ang a, kan awm khawm tel tel thei dawn lo, harsatna kan tihte hian tlakbuak hun a nei dawn a, chutiang thlen theih laka insum theihna chu kan tih makmawh a ni.

A nihna takah chuan sorkar hi sawsel thei lutuk tur pawh hi kan ni lo. Thiamna nei lo mihring kan awm lova, kan thiamna neihte eizawnna emaw suma chantir thei tura taimakna nei lo kan tam vang hian kan buai ni zawkin a lang.

Tih tur nei lo mihring a awm theih lova, an thawk chuak em? tih chu ngaih pawimawh zawk tur a ni. Pawl thila hman tak, a kul ataia hman thei rengte hi an felin an ropui tia teh ngawt chi a ni lo. Enge a hnathawh, a sum lakluhna chhutsak hnua a hnatlin taka a tih theih chuan a hmantlak hle tihna zawk a ni.

Kan veng mai a ni lo, hei hi Mizoram pum thanmawhbawk a ni a. Central YMA president pawh hian a vei hle. A nihna takah chuan kan ramah hian hnathawh tur hi a tam thawkhat a ni. Mahse, hna tia kan sawi hian sorkar hna kan kawh tir tlat a, kuthnathawh chu zahah la in chu chu remchanga hmangin vai kan tih te leh Burma mi ten sum tam tak hailuhnan min hmansak thung a ni.

Kum 150 kalta khan America rama rel kawng pawimawh siamnana hna hahthlak thawktute chu Chinese ho anni a, an diriam a, an hmusit bawk a. Mahse, tunah chuan America in rel kawng thar duan a tumnaah Chinese technology a hmang tawh thung, an hmuhsit an ruai tawh a nih ber chu!

Hnam dang te hi veiin diriam hle hhin mah ila a nihna takah chuan kan thawh peih miah loh thawktu annih avangin an tellovin kan awm thei lo tluk a ni tawh. Kan inbihchian deuh chu a ngai e.