Mi 12 Leh Red Ribbon

- MARYMA

Kum 30 zet a ni ta HIV virus hriatchhuah a nihna pawh! Red ribbon chu he natna hriatna leh chhinchhiahna a ni a, tunah chuan ribbon sen chu tute pawhin HIV symbol angah kan ngai tawh a nih hi!

Aids natna hmuhchhuah a nih hnu kum 10 zet a liam hnuah mi 12 inhmukhawmte chuan hmalakna thar an ngaihtuah a. Chu’ng mite chu photographer te, painters te, film makers te leh costume designer te anni nuai.

Darkar khat khunkhan fea an thutkhawm hnuah khawvela symbol larber te zinga mi an ngaihtuah chhuak a. Chu chu red ribbon, HIV/AIDS veite tanpuina, hriatpuina, puihna atana an siam chu a ni.

Chu meeting kaihruaitu Patrick O’Connell chuan, ‘Thil siam awl tak, awmze lanchhuahtir awlsam tak siam kan duh a’ tia sawiin, ‘Thil awlsam tak a ni. ribbon inches 6-7 velah i tan bung a, i kut zunga zialin awlsam te in i siam thei a ni’ a ti.

Chu ribbon chu O’Connell a din New York-a inkhuar Visual Aids HIV/Aids awareness lama hmala chuan project-ah an nei zuita a.

He inhmuhkhawmna hi May 1991 kha a ni a, a inhmuhkhawmna hmun pawh New York-a gallery pakhat PS122-ah a ni. Chutihlai chuan Aids chu mikhual tak a ni a, a veite pawhin an sawi ngam lova, hlauh leh tihbaiawm a ni a. Mi tam takin an thian leh chhungte hrilh ngam lovin an thihpui hun lai a ni.

He inhmuhkhawmnaa tel photographer Allen Frame chuan, ‘Khatih hunlai khan New York-ah meuh pawh mi tam tak khan sawiho pawh an duh lova, zahah an la tlat a ni’ tia sawiin, ‘He natna veite tanpuia hriatthiam a, mal lutuka an awm kha kan duh lova ni’ a ti.

Red ribbon kher an ngaihtuah chhuahna chhan pawh Gulf War laia US sipai te mipui ten an support zia lantirnana ‘yellow ribbon’ an hman vang a ni. Pink leh rainbow colour te pawh an ngaihtuaha mahse mawngkawhur ho nena inzawmna nei nia an hriat vangin an thlang lo. ‘Rawng sen chu a huai hmel a, hmuh a awl bawk a. Hmangaihna leh ngainatna nen a inzawm a ni‘ tiin Allen Frame chuan a sawi bawk.

Vawi hnih inhmuhkhawm an nei leh a, chumi hnu chuan a design simple tak pawh hi an pawm fel a. New York khawpui hmun hrang hrangah dahin theatre-ah te an dah tel bawk a.

An meeting hmasak ber hnu kar reiloteah ribbon an siam 3,000 lai chu Tony Awards an semna Minskoff Theatre, Broadway-ah an thawn a. Tahchuan actor Jeremy Irons chuan stage-ah a chhuah pahin pakhat chu a rawn tarta va a.

‘Chumi hnu nithumah chuan media lam chuan an ngaihven zualta hle a. Hollywood a chengho chuan min rawn be tanta a ni’ tiin O’Connell chuan a sawi.

Demand a sangta vak a, Visual Aids chuan hmeichhia chenna neilo ho an dahkhawmna Home pakhat nena tangrualin ribbon chu an siam belh a. Oscar ceremony neihna sem turin ribbon 10,000 an siam leh a, a kum lehah chuan an ribbon siam chu 1.5 million a tling chhota a ni.

Hollywood star lar Bette Midler leh Richard Gere chuan ribbon chu an kawrah an atar satliah mai a ni lo, a pawimawhna an sawi zui a. Chumi hnu chuan lemchan leh ribbon sen chuan inzawmna thuk zawk a neih phah a ni.

Kum 1992 Easter Monday khan red ribbon chuan Atlantic tuipui thlawh khumin ribbon 100,000 lai chu London Webley Stadium a Freddie Mercury an Aids benefit concert a neihnaah thawn a ni a.

Hei mai bakah hian America-ah pawh School leh Biak In-ah te chu natna chungchang tarlanna leh sawifiahna neih pahin tihlar chhoh zel a ni bawk.

Red ribbon project a neitu Visual Aids te hian sumdawnnan an hmang lova. Khawi hmunah pawh, eng hunah pawh siam a, tar phal a ni. Hei vang tak hian US post office stamp-ah hial a lang a. Mi 12 te hmalakna avang hian ribbon sen hian tihlar a mamawh tawh lova, world Aids day a ni emaw a symbol hian hrilhfiah a mamawh tawh lo hial.

‘Aids vei tam tak chuan ribbon sen tar ve dang an hmuhte hian anmahni chauhin an vei lo tih an hriat phah a, chumai nilovin a veilote pawhin anmahni khawngaih an lantirnan an tar tih an hriatte hian an lawm em em a ni’ O’Connell chuan a ti a.

‘Sawiselna pawh a awm tho a, mahse, hei hi symbol mai chauh a ni. Mahse, symbol hi a pawimawh a. Tute pawhin an hrefiah thiam hian he natna tihbaiawm tak hi a tichiang zual a ni’ a ti a. ‘Neitu nihna neih tum hauh lova, khawvel puma Aids veite hriatpuina leh tanpuinaa zalen taka hman a ni hi a ropuina a ni’ a ti bawk.

Heng mi 12 te hi a hnuah an thawkho zui lo, mahse, an hnathawh ropui tak avang hian khawvelah Aids do na chu chak zawkin a kal theih phah a ni.