Zu khap bur dan tha ber

- Lalhmangaiha Sailo

Tunlaiin MLTP Act (Zu khap burna dan) hlih leh hlih loh thuah inhnialna a tam hle a. Sorkar pawhin NGO hrang hrangte ngaihdan leh an thurawn a la mek bawk a, Chutih laiin Kohhran thenkhatin chhunzawm zel thain an hre bawk a. Ngaihdan a tam a, pawm dan a tam bawk si a, hotute tan pawh kal ngaihna hriat a harsa duh hle in a lang.

Hemi chungchangah hian ngaihdan han thawh ve ka duh a, chhiartute ngaihdan chu a ni vek lovang tih hre rengin han tarlan ve hrim hrim hi ka duh a ni. Kan ram, Mizoram hi a tam ber chu Kristian kan ni a, eng Kohhranah emaw chuan member kan ni deuh vek bawk. Mizo hnahthlak zingah phei chuan mi tlemte chauh Kristiana inchhallo kan awm niin a lang. Hetiang anih avang hian Kohhran hote hian mawhphurhna lian tak kan nei a, sorkar hotute tibuai zawng ni nilovin kan mi leh sate hi ngaihven atul zawk a ni. Zu ina rui thinte hi tute nge ni? Kan mi leh sa te ngei an ni si a.

Dan siama a zawrh lam khap tum chu a hlawhtling tawk lo tih lah phat rual a ni silo. Engtinnge kan tih tak ang? Zu that lohzia lah Bible-ah hmun tam takah kan hmu bawk si, in suh u tiha in lo mai thei lah an awm bawk silo. A in thinte hi an sual bik vang pawh a ni lo, sual hnathawh an do zo lo a ni ve mai bawk si, keini kohhran ho pawh kawng dangah sual laka fihlim kan awm chuang si lo, a buaithlak teh zawng anih hi.

Kan Pathian thu in min hrilh angin ‘Kan buante hi tisa leh thisen an ni si lo, Lalnate, thuneihnate leh he thim chunga khawvel roreltute leh, van hmunahte thlarau sualho awmte an ni zawk e,’ (Eph. 6:12,13) a tih hi a dik reng mai. ‘Chuvangin ni tha lovah chuan indo zawhna tur leh in tih zawh vek hnu pawha in din theihna turin, Pathian ralthuam famkim chu la rawh u’ a ti reng a ni. Kan ralthuam chu Pathian thu a ni tih min hrilh zui nghal bawk (Eph 6:14-18). Zu in thin leh zuar thinte kan sim tir theihna awmchhun chu Pathian thua anmahni hneh leh an tana tawngtai thin hi a ni ta ber anih chu. Mi a pianthar chuan ‘Thilsiam thar’ a ni a, a tih thinte a tih a rem tawh lova, a pianthar phawt chuan ‘Kai thlang li’ zat zet pawh Zu awm mahse a in duh chuang lovang. Mi piangthar leh harh tharte enkawl leh umzui lamah pawh tan kan lak erawh a ngai hle thung ang. Zu in tur ber an awm loh chuan tunge zuar peih ang, a zuar tur an awm loh chuan MLTP Act pawh hman tulna a awm lovang.

Chuvangin, Mizorama Kohhran hote hi i harh thar zawk ang u, kan memberte hi Krista hnena hruai turin theihtawp i chhuah zawk ang u, sual hmanrua ‘ZU hi’ buaipui lovin sual awmtirtu ber Setana hnehna hi puang ila, kan hneh ang hnehtu Pathian vangin tih hi hria ila. Hla siamtu in ‘Krista hmachhuanin thim lal kulh i tawn ang u’ a tih angin Pathian thu leh tawngtainain tan la ila, media lama ngaihdan hrang hrang theh darh ai chuan a sawt zawk ngei ang. Zu khap bur dan tha ber chu mite taksa leh thlarau chhandam hi a ni ngei ang.