HRISELNA
Mihring thil neih zing a hlu ber chu nunna hi a ni, a dawtah chuan hriselna hi a ni ngei ang. Hriselna tello chuan nun hian awmzia a nei lova, tangkaina pawh a nei tam lo. Nun hlimna leh nawmsakna chenin a tibo thin. Taksa a hrisel ver vawr loh chuan engtihmah hi a nuam lova, mahni hna nuam tih zawng a thawh theih lohva, duhna hmun hmunah a kal theih hek loh. Ei leh in thu ah pawh mahni tui tih zawng leh chak zawng pawh a ei theih thin loh.
Hriselna hi mihring kan nih chhunga kan thil mamawh ber leh nun tak tak intan chhuahna bul ber a ni. Hlimna, lawmna, chakna, mawina, dam reina, nun nawmna, hmelthatna, hausakna leh dinchhuahna bul a ni. Chuvangin hriselna hlutzia leh pawimawh zia hi kan hriatchian a ngai tak meuh meuh a ni.
Tupawh mai hian kan taksa hi uluk taka kan enkawl that a, hriselna tha nei tura hma kan lak a pawimawh hle a ni. Mahni tan bakah chhungkaw tan, thenawm khawveng leh ram pum tana tihtur pawimawh tak a ni. Mi in natna a tuar a, a lo hrisel loh chuan amah a hrehawm a, mihring nundan phung zawm theihloh a ngah thin. Amah leh amah a inenkawl theihloh chang a awmlo thei lova, mi dang pahnih khatin hna thulh a enkawl a ngaifo thin. Amah enkawl a, ei leh in, silh leh fen ngaihtuah sak a lo ngai a, chu chuan mi tam takah phurrit a siam thin.
Hriselna chungchang han sawi hian natna enkawltu, damdawia inenkawlna lama hnathawktute mawhphurhna chauh a ngaite kan awm thin. Hei hi ngaihdan diklo tawp a ni. Hriselna tha nei tur chuan mahni ngei hi kan pawimawh ber a ni. Ei leh in kawngah te, thianghlimna kawngah te kan invawn uluk a, taksa anih tur ang taka a hrisel theih nan exercise lakte kan zawm that a pawimawh hle a ni.
Kan taksa in a mamawh ni lemlo thil hrang hrang kan ei in kan in a, kan hmuam a, kan zu thin. Nikhata kan sum sen ral pawh tam tham tak a ni fo. Heng sum zozai hian enge kan lei chhuah le? Tihdam hleih theihloh natna mai a ni. Natna a lo chhuahin intihdam kan tum lehna lamah a letin sum kan seng leh bawk si. Hetianga phurrit insiam hi a finthlak loh hle a ni.
Hriselna tha neihna kawnga pawimawh tak pakhat chu thianghlimna hi a ni. Natna tam tak hi kan invawn thianghlim tawkloh vanga lo awm a ni chawk. Tui thianghlimlo in te, kut bal chunga thil ei te, bawlhhlawh kai thil ei mai kan ching te, inthiarna kawnga kan fimkhur tawklo leh inthiar zawh hnua sahbawn hmanga insilfai kan chinglote thleng hian natna intanna bul a ni thin. Khawlaia inpen parh ve tak, inchhung tawp hle si, mutbu bal taka zana mu leh mai thin te, bazar a thilzawrh silfai lemlova kan ei leh tawp mai thinte hian kan hriselna a khawihchhia a ni. A hun takah inveng ila kan buaina tam zawk hi chu kan pumpelh thei ngei ang. Sebo hnua se kawngkhar aichuan a bo hmain veng tha ila a fin thlak zawk ngei ang.
Hriselna tha kan neih loh chuan intodelh pawh thil theih a nilo. Sum khawl chu khawilamah a hmanlohna tur lamah a liam tam zawk thin. Chuvang chuan hriselna tha nei turin tan la theuh ila. Kan nundan, kan awmdan leh khawsak dan hi hriselna kawngah a pawimawh a ni tih hriain, keimahni theuh hi mawhphurhna i inbel theuh ang u.
