Letter to Maryma Editor

SUNDAY TLAIA RSC FIELDA NAUPANG INFIAM
MARYMA a chhuak, ngaihdan huanga zawhna, ‘Sunday tlaia RSC Field-a naupang infiamte hi khap chi an ni em?’ tih zawhna kha ‘Aw’ ti kha 86% lai a ni a, ‘Khap chi loh’ ti kha 14% chauh an ni thung a. Chuvang chuan a tam lam chu a tha zawk turah ngai ta ila. Amaherawhchu hemi kaihhnawih hmang hian zawhna hrang hrang siam ila, a chhanna hriat a chakawm hle mai.

1. Heng naupang infiamte hi khap ta ila, khawiah nge an awm kan rin? In-ah nge, kawmkarah nge thlanmual velah emaw vengdangah?
2. Heng naupangte hi khap ta ila sual tihna kawngka kan hawn zau sak a ni thei mai ang em?
3. Nu leh pa tam tak chuan kan fate ina awm turin kan ti thei mai thei, kan thei vek ang em?
4. Sunday chawhma leh chawhnu inkhawm zawh tawh hun awlah hian Kohhran emaw khawtlang / nu leh pa te hian infiam aia tha zawk programme kan buatsaih sak thei em? Buatsaih thei ta ila an peih ang em?
5. Sunday tlaia kan fate awmna chin hria leh an thiltih hmuh phaka an awm hi nu leh pate tan a hahdam thlak zawk em?
6. ‘Kohhran nung taka a kalna ram Taiwan-ah chuan Sunday tlaia naupang leh tleirawlte infiamna turin Biak In tualah Basket Ball court leh infiamna chi hrang hrang a awm’ an ti a, hetiang rilru hi kan pu ve thei tawh em?
7. Khawp leh ngawt thin ai chuan chhungkuaah, school-ah, sunday school-ah zirtirna uar ta zawk ila, a thatdan a ril zawk ang em?

Heng zawhnate hi ‘Khap chi a ni em?’ tiha ‘Aw’ han tih awlsam ang ngawta ‘Aw’ han tih chu harsa ka ti em a, ka han chhawp chhuak ta mai a ni e.

-Ruata Zote