NGAIHTUAH A NGAI
Mi thahnemngai engemaw zatin chhun zan zawmin chawngheiin ram leh hnam tan Pathian an au thin a, an au mek reng a. An zinga thenkhat phei chu kum upa lam tawh te an ni a, an inpekna a sangin an tum a ruh a, chhuan tam tak chawnghei tawh mahse an la chau chuang lo. Ram leh hnam veia chawnhgei te, sualna nasa tawh a reh theihnantea chawngheia Pathian au hi an awm reng a ni.
Politician-ten ram an kaihruai a, an hnuaiah sorkar hnathawkten hna an thawk leh thung a. Chutianga inrelbawlna hnuaiah chuan tuna kan dinhmun hi kan thleng ta a ni. Kan ram dinhmunin a zir loh ni maw ram veitu an tam tial tial a, a sawia sawi mai duhtawk loin a tak taka mahni hma zawn theuh a phak ang tawk zela hmalak tum pawh an lo chhuak tiam tiam ta. Chung zingah chuan kohhran mi, ringtu tha tak takte pawh an bang bik lo, anni ngaihdan hi chuan Pathian hnenah chauh kan hnam damna leh a dinchhuahna hi a awm a ni. Chuvangin, thahnemngai takin Pathian an au mek reng a ni.
Kan Larsap kal chhuakta khan Mizoram chu state ralmuang ber a nih thu a sawi a. Hei hi a dikna chen pawh a awm ang, hmarchhak state dang zawng zawngah hel pawl an awm thluah laiin kan ramah an awm ve lo ngawt pawh hi hnam dangho zingah chuan inchhuanna tham pawh a ni awm e. Helho beih tur awm ve lo mahse mipui nun hi a him tak tak em tih erawh ngaihtuah thui tham tak a ni.
Tun hnaiah phei chuan tualthi an tamzia te, pawngsual tawk an tamzia te kha han ngaihtuah let ila mipui mimir nun hi a him lo riau pawhin a ngaih theih tho mai. Mizoram chhungah helhoin bu an khuar tih thawm a awm reng bawk a, hnam tihbing rilru pua mahni inhaivur tuma politics khel tawk lah bo lo. A lang apaua hel pawl an awm loh vang ngawt hian kan ram hi a ralmuang tihna a ni lo maithei.
Mi ramah hi chuan han ti ila buaina nasa tak te hi an tawk ve tho thin maw le. Mahse, anni chu an buaina an hmetmit ni lovin buaina a awm tawhlohnan insiamthatna an nei thin. Kan ramah hi chuan buaina hmehhmih hi kan thiam a, mahse, chu chu a chhanna a ni ngai lo. Buaina awmchhan a awm tawhlohnana a buaina tak siamthat chu tih tur ni awm zawk tak a ni.
Sualna punlun chhan hi mitinte kan inzawh a ngai a, a punlun han tih hian thil pawi leh liantham a thleng e tihna lam a ni lo. Vengchung vawnhimna kalpui duhna kan nei lian a nih chuan enge maw a awm tawh tihna a ni a, chutiang zelin harsatna awm hnua che thin kan ni a, harsatna awm theite tihreha kan siamthat thin loh vang a ni.
Hnam ang chuan kalphung nei tha em em inkhai diat tha thlap Kohhran thleng pawhin kan nei a ni. Mahse, hei hian thui tak min chelh zo ang em? Tha taka ruahmanna fel tak anga lang si phen (behind the scene) a thil thleng awm thin te hian thil tha tur hi a tichhe thin a ni em? I ngaihtuah tlang teh ang u!
