SUM HARSAT VANGA BUAINA
Europe leh US a sum leh pai lama harsatna thleng mek avangin ram hruaitute, sumdawngte leh mithiamten theihtawp an chhuah mek a. August 28 khan Jackson Hole a ram hrang hranga central bank enkawltute an inhmukhawm a. Khawvel huapa sum leh pai lama pa rawnkai chin thiau hmaa thusawitu French finance minister hlui, IMF Managing Director thar Christine Lagarde chuan khawvel hun tawn mek hi a hlauhawm thei dawn tih a sawi lang.
“Khawvel pum economy hian hun thar hlauhawm tak mai a chuang kai tan mek a, a hlauhawmna chhan chu ram hruaitu leh thuneitute (policy maker) hian thil tul leh pawimawh ber ber an tih duh thin loh vang a ni,” tiin Pi Lagarde chuan a sawi. Ruahmanna khauh tak mai, zawm ngei ngei tur a siam zingah chuan Europe a bank hrang hrangte pawisa an lak luh a, an kawl theih dan tur te, America ram a (loan rulh thei lo an tam vanga) sum harsatna thleng mek siamthatna tura ruahmanna te leh sorkar hrang hrangten sum indaih lohna an tihtlem dan tur te a tel.
IMF hi ram hrang hrangte intawm (bank) ni mahse, ram hrang hrangte sum leh pai buaipuitu, a tul anga tanpuitu a ni a, an chungah thuneihna sang tak a nei bawk. IMF rawtna khauh tak tak zinga langsar ber mai chu Europe a bank hrang hrangte hmalak dan tur a ruahmansak hi a ni. Pawisa kawl tam tura thurawn pek an ni a, chu chuan Euro (EU ramte pawisa) in harsatna a tawh mek chinfelna tur pawh a ni thei dawnin a ngai a ni.
America pawh hmalak dan tur ruahman sak a ni a – loan rulh theih loh vanga harsatna te, in hmun hralhna man tlahniam te leh chhungkaw sum hman zat tlem zel tih tawp te hi rawtna langsar zual a ni. Pi Lagarde rawtna siam langsar ber berte hi Europe leh America tan a ni hlawm a. Heng bakah hian ram thang lai hmasawn chak zualho pawh an tih tur tuksak an ni bawk. Khawvel pum sum leh pai dinhmun intluktlang lo tial tial hi ram hmasawn chak zual bikte (China, etc., a sawina) an tualchhung mamawh an siam tawk loh vang leh an pawisa hlutna tipung tura hma an lak tawk loh vang niin a sawi bawk.
