Polythene hi
Ruah a lo sur buan buan a, kawr tinah tuihawk a lo luang dul dul a. Kawr thenkhat chu bawlhhlawhin a hnawh avangin kawngdungahte tui hawk a luan phah leh nge nge thin. Heng bawlhhlawh, tuihawk lo dangtu hi han thianfai mah teh. Khel lovin polythene eng chi emaw tal chu i hai chhuak tel ngei ang.
Mihring kan changkang chho zel a, nitin khawsak naah a samkhai leh awlai zawk kan zawng chho zel a. Chu chuan thiltha tam tak a thlen laiin thil thalo eng emaw ken tel a nei leh thin. Chung zinga pakhat chu polythene hi a ni. Polythene hi mihring hriselna a tan a thalo tih leh leilungah hian a tawih ral theihloh avangin lei min leh chhiatna dang a thlentu a nih theih thu kan hria a. Hun rei pawh kan la hman hauh hma hian hman tawh loh leh tihbo tumin hma lak ni bawk mahse kan nunah hian a lo bet nghet hmanin, a samkhai kan zawn luatah hian kan la thlah hlei theilo chu a nih hi.
Khawpui hnaih deuh kawr tinah hian han kal ila, polythene hmuh tur a lo awm zel zul thin. Mithiamte sawi dan chuan kum 500 dawn, ral lovin lei chhungah hian a inphum thei an ti. Chuvang chuan lei chhunga tui luang ral mai tur a lo dal a, thlai, thing leh mau te chaw siamna tur a dal fo thin. Lei chhung thuk takah a pil khat hle a, lei insawh muk tha tur a ti thawleng a, lei a tinghet lovin, lei min a siam duh hle a ni. Tawih ral theilo na na na chuan lei pawnlangah pawh bawlhhlawh chi hrang hrang a lo fun khawm a, tenawm leh tawp tak niin natna insiamna hmanrua a chang mai thin.
Polythene hrim hrim hi mihring hriselna atan a hlauhawm a, rawng nei ho phei hi chu a hlauhawm lehzual. Mizote hian kan hmang tak bawrh bawrh a, ei tur ilo fun nan kan hmangfo thin a, hei hi a hlauhawm hle a ni. A rawng atanga natna kai theihte kha eiturah a lo kai a, kan lo ei tel thin a. Kan taksa-ah inchhek khawmin chhiatna min thlen nge nge thin. Heng vangte pawh hi a ni ta ve ang, mizote cancer kan tam tak em em hi!
Polythene kan hmelhriat hma zawng pawh khan ipte, em leh remchang dangin eitur chi hrang hrang kan kengin, kan khawsa thei a, tunah theihloh ngawt thu a awm dawn em ni? Kan hriselna atan a hlauhawm a ni tih hriain ei tur fun nan phei chuan hman hauhloh tur a ni. A thatloh zia leh a hnathawh kan hmuh nghal mai loh avang hian hlauh loh ngawt chi a ni lo. Mithiamte’n an enchhinnaah pawh mihring hriselna atan thalo hrang hrang bakah heavy metal ho phei chu a kim vek ti hialin an sawi a ni.
Mizoram Pollution Control Board ten thalo tiin hma an la a, polythene la lutte pawh an hnena inhriattir turin a ti hial a. Khap bur emaw tirem hmak tur pawhin thupek lo chhuak pawh nise, mipuiin kan thlawp that loh chuan a hlawhtling thei lovang. A thatlohzia hi tam zawkin tlangau pui ila, kan ram, kan hnam tan hian inzirtir uar deuh deuh ila, kan him tlang a ni mai. A pawimawh berah chuan mizo mipuite hian polythene hi hman duh loh nachang i hria ang u.
