Kan hmasawnna hi
- MARYMA editorial, 09.04.2011
He ram hi ram rethei a ni a, sum erawh a tam hle thung! In ropui tak tak a awm teuh a, khawl changkang ber ber a tam hle bawk. Lirthei ni se a zuarte chu India rama a hralh thei ber ber an ni hlawm a, mahse, a ram chu ram rethei a ni si. Ram retheiah car an hralh chur chur ngai em ni? An hralh chur chur a nih ngat chuan thil dik lo a awm tihna a ni ngei ang.
TV zuarte an inhralh thei hle a, lirthei zuarte lah chuti bawk. Computer zuarte ni se a inhralh thei ber ber emaw an nih tih tur khawp an lo ni leh a, washing machine zuarte pawh chuti tho.
Bungrua leh khawl thil hrang hrang zuarte chuan hralh that lawmman an dawng mawlh mawlh a, chu chuan he ramah hian bungraw tha pui pui a tam tih a lantir awm e.
Telephone, bike, car, TV, computer, a enga pawh hi Mizoramah hralh a kal em em vek. Aizawlah phei chuan lirthei nei lo chhungkua nih bik chu thil tlawm thlak a ni tawh ti hialin a sawi ngam ang.
Chu chu a ni ropui kan tih chu. Chutiang chu ropui kan tih avangin thil kan nei ta sup sup a, tichuan, hmasawn chak kan inti bawk a. Chu’ng chu kan rualawhna lam pawh a ni. Chutiang kawng chu chak taka zawh ve kan chak ni te pawhin a lang a, hmasawnna kan tih pawh hi chutiang chu ni berin a lang.
TV leh fridge kan neih tak fur thu te, lirthei kan ngahzia te kan chhuang a, ‘hma hi kan sawn chak ngawt mai’ tiin kan sawi thin. ‘Hmasawnna’ kan tih ve chu chutiang chu a ni deuh mai.
2004-ah Mizoramah mobile phone a lo lut a, a than chak dan hi a namen lo khawp mai. Sum leh pai lama he ram pachhiatzia leh ei leh bar lama he ram dinhmun that lohzia te han ngaihtuah hian a mak lehzual a, chutiang ngaihtuah miah lo pawhin a mak tho awm e!
Mobile phone hian kawng hrang hrangin kan hnam nun a nghawng a, a chhe lam leh a tha lam sawi tur a tam ang. Hei erawh a chiang- mobile phone-in kan hnam nun a khawih dan hi kan zir lo. Chik takin zir ila, a thatna leh that lohna te hria ila, hetia sepui ruah tawrh ngawt lo hian, kan hlawkpui dawn vei nen. Hetia handset kan hum fur hi hmasawnna a ni ngawt lo. Chutiang bawkin thil dang pawh.
Hei hi kan hre reng tur a ni- Bungraw ropui ber ber nei fer fur mah ila, kan taksa leh rilruin hma a sawn loh chuan eng kan ang chuang lo ang tih hi.
