LOL

- Lalremruata Renthlei
Internet slang ‘LOL’ (laughing out loud) chu Oxford English Dictionary chuan thumal awmze nei anga ngaiin a seng lut a.

“OMG! LOL, LMAO”

A chunga tawngkam te khi i hrethiam lo a nih chuan information khawvel-ah hian i khawvel a sang lo tihna mai a ni.

Oxford English Dictionary chuan LOL chu, ‘electronic communication a hman fiamthu thawhnan emaw engemaw sawina tawngkam leh mak tihna sawinan pawha hman a ni’ a ti.

LOL rual hian OMG (Oh My God) tih pawh dictionary-ah hian sengluh a ni a. OMG pawh hi LOL ang thovin e-mail-ah te, social networking a inbiaknan te leh tawngkam tluang pangngaiah pawh hman a ni.

Khawthlang ramah chuan LOL leh OMG hi pub leh puipunna hmunah te pawh an hmang nasa hle a.

Oxford Dictionary principal editor Graeme Diamond chuan, ‘Kan duh emaw duh lo emaw tawngkam lar ber pawl leh hman tlanglawn a ni tawh hrim hrim a, pawm loh theih loh a ni tawh’ tiin a sawi.

Internet hmang nasa ho chuan LOL hi an hmang tangkai hle a, nitin nuna telve turah an ngai tawh a. Polite tawngkam atan te, inbiakna hrim hrim atan an hmang nasa hle.

Internet-ah tu emaw nen in inbiaa a thusawi nuihzatthlak lutuk loh pawh nise thukhuhna chikhat atana hman tangkai tak a ni.

Chumi awmzia chu midangte thil sawi leh sawifiah tumte, an titina hrim hrim te lo zawm ve nan pawha lo LOL kha a kawnghmang ve hrim hrim bawk.

Tun hma chuan LOL hi nasa taka kan nuih entirnan pawh internet hmangtu te chuan an hmang thin. Mahse, tunah chuan LOL hi a tawngkam tak tak tawh em vangin nuihzatthlak tak emaw kan nuihzatzia lantirnan chuan ‘ha’ emaw ‘he’ emaw ‘hee hee’ tihte anhmangta zawk.

Hetihlai hian kum upa lam chuan LOL tihte chu an hrethiam ve lo bawk a, tawngkam tak tak ema sengluh chu an helh deuh tho. Mahse, Plain English Campaign hotunu Mary Clair chuan, ‘Kum upa lam te pawh hian an hun lai chuan slang an hmang ve nasa tho a, chu chu hun a reia tawng thumalah sengluh a ni ve tho a, helh em em tur anni bik lo’ a ti.

LOL hi kum 1980 chhoa Computer a lar chhoh tirh phata lar chho tan a ni. LOL hmanna upa ber hi Usenet a internet discussion forum a hman tan nia ngaih a ni.

LOL hi Calgary a awm Wayne Pearson chu a hmang hmasa ber nia ngaih a ni a. Mi pakhat nena an inbiaknaah he tawngkam hi a hmang hmasa ber nia ngaih a ni.

Hemi hnu hian zawi zawia lar chhoin kum 1990 chho khan a lar zualta a. Naupangin hmang tanin chuta tang chuan a larchhota hluai nia ngaih a ni. Hetihlai hian kum upa lam chuan LOL hi Lots of Love tihna angah an lo ngai ve bawk a, chutak chuan LOL chu a vawrh lar zual nia ngaih a ni bawk.

Internet hian tawngkam tam tak a chherchhuak a, tunlaia mobile a text nana kan hman tam tak Thank You tih aia ‘Ty’ ringawt te pawh hi internet-a uar hmasak vek a ni zawk.

Tawngkam dang tam tak aia LOL danglamna chu hriatthiam a awl bik a, awmzia a nei a, thu uarnan leh uar vak lohnan pawh a remchang ve ve nia ngaih a ni a. Nuihzatthlak miah lo sawinan pawh a remchang hle nia ngaih a ni bawk a.

LOL atang hian tawngkam dang pawh a piangchhuak tam tawh hle a, heng ‘lolcano’ tih te ‘megalol’ tihte pawh hi LOL atanga piangchhuak a ni. Symbol (:D) te pawh hi nui sawina tho a ni a, internet hmangtute chuan an hriatsa a ni.

English mai ni lo French pawhin LOL tlukpui a awm a, chu chu ‘mdr’ a ni. Hebrew pawhin a awm a, chu chu ‘nnn’ a ni thung. Thai ho pawhin ’555′ an hmang a, Swedish chuan ‘asg’ ni thungin, Afghan pawhin ‘mkm’ an hmang a. A vai hian LOL chhulchhuak vek anni.

LOL chu slang word a ni a, mi tam tak chuan slang (tawng ler) hi an ngaina lo. Mahse, slang word hi tawng tihausa tu ber a ni zawk.

Thil chiang tak awm chu, tawng hi a thihlohnan chuan tawngkam thar a pian reng a ngai tlat.