2011 YMA DAY THUCHAH

Kum 2011 YMA Day chu Pathian khawngaihna zarah kan lo thleng leh dawn ta der a, he hun ropui tak min hruai thlengtu PATHIAN hnenah thinlung leh tihtak zetin lawmthu YMA member tinte’n i sawi ang u.

Kumin YMA Day hi YMA member tinten mahni inbihchian nan hmang theuh ila, khawtlangah YMA member ka nih angin midangte tan malsawmna nih ka tling em tih i ngaihtuah ang u. Kristian nundan tha ngaisangtu pawl YMA member ka nih angin ka nun chhungrilah ISUA KRISTA a lal ber em tih ngaihtuah teh ang u. Mahni mimal nun theuhah insiamthat ngai lai a awm anih chuan YMA takin i insiam tha ngam ang u.

Ramhlun North YMA member zawng zawngte chu mahni nu leh pa chawimawitu, khawtlang leh ram tana chanchintha maichher chhem alh rengtu leh tanpui ngaite tana Pathian ropui nana malsawmna thlentu ni zel turin ka duhsakna sang ber ka hlan theuh a che u.

Ramhlun North YMA thiltihna reng rengah hian Pathian Lalber zel rawh se.

June ni 15, 2011, YMA dincham vawi 76-na hlimawm takah hian YMA member zawng zawng chibai bukin, Central YMA hmingin duhsakna ka hlan a che u.

Kan thuvawn ‘YMA chu tanpui ngaite tanpuitu a ni’ tih thuvawn hlu leh chhuanawm tak kan neih hi i hre thar leh ang u. YMA-ten “damlo thisen an pe, hmeithai leh rethei In an sa” tih te hi a ri a mawi mai ni lovin a dawngtute tan a va hlu thin tehlul em!

Kum 2011 hi “Khawtlang nun siam that’ kumah YMA chuan kan puang leh a, khawtlang nun siamtha tak tak tur chuan do ngai dova, nunpui ngai nunpui leh inzirtir ngai in zirtir a ngai a ni.

1. Do ngaite:
a) Ruihhlo: Kum 4 lai YMA ten ruihhlo kan do chhung khan ruihhlo chi hrang hrang kan do rêm hauh lo. Mahse, nasa takin a tawmim a, a zuartute leh a ti thinte an ralti hle a nih kha. Ruihhlo bâwiha tlu lut tur thalai sang tam tak chhanchhuah in an awm. Khatih hun lai khan a luhlul leh dawklak zual tlemte-in an thih phah a ni. Thupui dang kumpuanah kan hmang a, spring thutbeh thawhsan ang maiin ruihhlo chi hrang hrang chu an lo perh leh at mai a, a insûm thei lo zualte phei chu ‘pumna’ leh pungphu chawl’ in an thi leh ta a ni. CADS in May ni 29, 2010 atanga May ni 31, 2011 chhung khan ruihhlo chi hrang hrang cheng nuai 184 man an man hman a. Hei hi Branch, Group leh Sub-Headquarters te man tel lovin, CADS man chauh a ni. Heti zat damdawi hi Thalaite Thisena lût nise engzat takin thihpui ang maw?

Kan duat lai, kan fanauten an thihpui a ni tih hrerenga zuar lui tlatte hi kan thih duhtu an nih miau avangin hmelma a ngaih a, ralpui beiha beih an ngai ta a ni.

b) Taihmâkna tangkai lo do a ngai: Pathian thu chuan tlakchham kan neih ngai loh nan hna tangkai thawka inhmang reng tur leh tumah awm mai mai lo turin min zirtir a ni (Tita 3:14). Mizote hi thlahtute atangin hnam thatchhia kan ni ngai lova, taihmâkna engemaw tak zawng kan nei deuh vek mai. Thingtlang khaw pakhata ka zinnaah, ka tupa pakhat chu, “Lo tin engzat hmun nge i neih ve?’ tiin ka zawt a. Ani chuan ‘Tin khat hmun chhungkaw pathumin kan intawm’ a ti. Eng malsawmna pawh dawng dawn se, tin khat hmun chauh zawng chhungkaw pathum tan chuan a ngaihna a awm lo a ni. Ka tupa chuan hna tangkai thawka lo zau zawk neih ai chuan hna tangkai lo, awm mai mai a taihmâk zawk vâng a ni.

Tunlai thangtharte zingah hnathawh chu sawi loh zing thawh tak ngial pawh peih lo an tam, tiin kei ngei pawh hian ka sawi thin. Mahse hna tangkai lo, Computer leh TV bula thut an taihmâkzia leh mut an taihmâk êm êm zia hi ka lo chhut tel lo a ni. An thatchhe lo, an taihmâkna a tangkai lo mai zawk a lo ni.

Bike silencer thlawna, bengchheng êm êm, hmanhmawh êm êma, zan rei tak thlenga tlan puat puat thin kan thalaite pawh hi an taima ka ti. An malpuite, an lû te pawh hian ‘spare’ a nei bik lo tih an hre ve tho. Mahse, an vei zawngah leh tul an tih zawngah an taima êm a ni. An hmaa lirthei dang tlante an pelh loh chuan kawchhung nâa thi mai tura an inngaih vâng nge, rem leh rem lovin an hmaa tlante an pêl hram hram thin. Ngaihtuah tur a tam, an taima a ni.

An tlan puat puat a, kawng chhia-ah an chesual tha duh miah lova, kawng tha an ngeih chuang der si lo. Ruihhlo zawnga vâk kual vak vak te, rûk thei ang bera zawrhna tur dapa tei tei te pawh mi taima an ni.

Thalaite’n hei hi ngaihtuah teh ang. Nalh taka i incheina kha engtia i neih nge? Tukthuan leh zanriah puar taka i ei thinah khan i thawh chhuah a tel ve em? Thalai tam takin sum hmanna tur kan hre thei hle a, hman tur deh chhuah nana hnathawh kan hreh leh tlat si hi a manganthlak lai chu a ni.

2. Inzirtir leh nunpui ngaite:
Kan ngaihsamna zia thlak a ngai: Kumin February thlaa Aizawl A.R.Ground-a Artificial grass an phah lai khan naupang, thalai, nu leh pa leh pitar putar tam takin an en huai huai a, tha an ti a, an kal chhin a, a then an mu hawn hawn a, an duh hle a ni. March ni 4-ah chu hmunah chuan Chapchar Kût kan hmang tak tak a, a thenin an pawt phawi a, a thenin sikret bungin an hliauva, a thenin babul gum an bel a, kan chhang eiturte kan rap pherh a nih kha. Mimala kan tihchhiat duh loh, huhova kan duh tlatna mizia hi siamthat a tul hle a ni. Mizote hi mimala ‘fel’ huhova ‘mawl’ kan ni zo ta em ni? Kan pungkhawm thu a mâwl fo thin danah hian ‘lu’ a tam zawh poh leh ‘thluak’ a tlem ta a ni mai lo maw?

Tin, a dik emaw, dik lo emaw pawh ngaihtuah chiang hmasa lova, reilote chhunga hausak thut kan duhna rilru leh mizia hi thlak a hun ta hle mai. Chiahpuam in a ben harh zawh loh Mizote hian belhchian dawl lo Bank leh Financial Institution thlengin kan bawh huam huam a. Central YMA-in zir chianna an nei a, chung zinga 22 te chu tunah khawiahnge an awm hriat hleih theih a ni tawh lo. A hman hmanin min bum ta mai emaw tih a awl.

Mizoram leh Mizo hnam tan YMA vul zel rawh se. Ka lawm e.