Young Mizo Association
- MARYMA Editorial
Borhsap A.G.McCall awmlai, Welsh missionary te leh kan mithiam hmasa te’n June, 1935 khan Young Lushai Association (YLA) an lo din a. Kum 1946-ah Young Mizo Association (YMA) tia a hming hi thlak a ni. Pathian rawn chunga din anih vang ni maw he pawl hi a thangduang hle a, zofate innghahna kulhpui leh min thuikhawmtu pawimawh tak a ni.
Mizote hi hnam mawl tak, hnam thang mek anih avangin zirtur tam tak a awm a, nundan leh awmdan tha kan hriatthiam theihna anih beiseina avangin he pawl hi a lo piang a ni. Mizo nula leh tlangvalte hian hunawl an hman that a, Mizoram hmasawnna tur an lo tih theih a, nundan kawng tinreng a Kristian nun an lo chhawm chhuah nana siam a ni.
A tirah chuan thil te tham anga langah an tan a, zun ram thiar dan tha zawkte, inchhung khawsak dan tha zawk – bungbel tihfai, in vawn fai thute an sawi uar a, lehkhaahte an ziak a, tam tak an thehdarh a, a lo sawt hle mai a, Mizoram hmasawnna hnar tha tak a lo ni ta a ni.
YMA kutthlakna liantham hmasa zingah chuan 1946 kuma kohhran nen tang kawpa ‘Chanchin Tha Dak’ tia an vuah mai, Tiau rala kristian awmte tan Pathian Lehkhabu, Hlabu leh zotawng lehkhabu awm ang ang an khawn khawma, thingrem pahnihah khungin, Mission Veng Biak Inpui atanga an zawn chhuah tan, khawtin YMA te’n an inhlan chhawn zela, Champhai lama an zawn chhoh kha a ni.
Hemi hnuah hian kawng hrang hrangin chak takin hma lakzel a ni a. Zofate’n hma kan sawnna tur leh changkang zawngake kan penna turin theihtawpa bei zelin, hnam inpumkhatnamai bakah kan ramro hlu, tlawmngaihna vawng nungtu leh kengkawhtu ber a ni chho zel a. Chhiatni thatni-ah khawtlang muantu, khaipa chan alo chang ta zel a ni.
Hetiang khawpa zofate tana pawl pawimawhah hian member pawh nuai chuangfe kan awm tawh a. Kan sukthlek leh hawi lam lam chu kan ram mipui ngaihchan leh bengkhawn ber a ni. Chuvangin, hruaitute mai bakah member tinte kan pawimawh takzet a ni tih hria ila, kan nundan kawng engkimah kan fimkhur tur a ni. Rah chhuah nun leh a tha zawnga mite kawng kawh hmuhtu, fuih phurtu leh thlamuanpui tlak kan ni tur a ni.
Sorkar rorelnaah pawh ram hnuk khawih thil bikah chuan thurawn kan pein, aw kan chhuah ngam tur a ni. Zofate hmasawnna ngaihtuahtu pawl kan nih angin kawng dik leh a thazawngah chuan huai takin ke kan pen ngam tur a ni. Amaherawhchu, YMA chu pawl thianghlim politics rawng kai lo a ni tih erawh kan hrereng tur a ni. Politics in a pawlh buai lohna turin he pawl thianghlim hi kan veng tlat fo tur a ni.
Eng hunah pawh, engtik lai pawhin, kan pi leh pute atanga kan rochun tlawmngaihna hi kan lanchhuah tir thei reng tur a ni. Member tinte’n entawn tlak nun han nei theuh mai phei ila chuan kan ram, kan khawtlang leh chhungkua a van nuam dawn tehlul em! Chu hun chu kan thlen theih nan YMA member zawng zawngte i inhlan thar ang u. Chu chu he pawl tum leh innghahna pawimawh a ni si a.
