Chapchar Kût hlawhtling taka hman a ni
(Ramhlun North Branch YMA Chawraw leh Khuallam-ah tel)
Ramhlun North, the 5th March, 2011 : March ni 4 khan AR Lammual-ah Mizote kût pui ber Chapchar Kût hlawhtling taka hman a ni leh ta a, kût hmanna Lammual khatin mipui an pungkhawm.
Kumin kût-ah hian Arts & Culture minister PC Zoram Sangliana chu Kût Pa a ni a, Chief Minister Lal Thanhawla chu khuallian niin Beth A Payne, US Consul General chu khualzahawm a niin Chapchar Kut Souvenir a tlangzarh nghal a ni.Khuallian chuan kût-ah hian kohhran hote pawhin an telpui tlak a hman zel thaa a hriat thusawiin, nikum atangin Chapchar Kût-ah pawh kohhran hruaitu ten an telpui tan ni a sawiin, lawmthu a sawi a. Kût hmannaah hian Mizoram Kohhran Hruaitute Committee Chairman Rev. C Lalsangliana, Synod Moderator-in hunserh hmang a ni.
Kumin Chapchar Kût hi AR Lammual-a artificial grass hnua hman vawikhatna a ni a, mipui pawhin an hlut hle niin a lang, kum dang zawng aiin kuminah hian kût hmang an tam niin report thenkhatah chuan tarlan a ni.
Chapchar Kût hi Mizo ten kan hnam nunze tam tak bopil mai tur chawinunna pakhat a ni a, kumin pawh hian cultural programme hrang hrang hman leh a niin, kan veng pawh cheraw leh khuallam entir tute zingah kan tel nghe nghe a ni. Khuallam bik hi Central YMA bultuma neih a ni. Cultural programme bikah hian Mizo hmeichhia te pual bik lâm, ‘Parlâm’ Serchhip-in an entir chuan hlut a hlawh hle.
Kût hi thalai te pawhin kan hlut telh telh niin a lang a, hnam nun leh tihphung
hriatna lamah pawh kan thang harh mek niin a lang bawk. Kumin kût-ah pawh hian tleirawl lam hmuh tur an tam hle a, kumdang aiin kum naupang deuh zawk te pawhin an hlut thar hle a ni.
Kumin hian kût organising committee-in kût hmang tura kal hmeichhiate chu kekawr ha lova puan bih uar turin an ngen a, kût hmang tura kalte chu Mizo thuam eng emaw tal inbel tura ngenna an siam bawk a, kumdang aiin hetiang kawngah hian kan thangharh thar niin a hmuh theih bawk.
Ramhlun North YMA hminga cheraw leh khuallam a tel zawng zawng te chungah Branch YMA-in lawmthu a sawi a ni.
