Faina kawngah tan la thar ang u
(Bawlhhlawh a paihna hmun ngei a paih hi changkanna a ni)
Ramhlun North, the 12th March, 2011 : Khua a lo thal chho zel a, vengchhungah kangmei leh chhiatna nasa zawk a thlen loh nan kan in leh a velte i vawngfai theuh ang u.
Kan hnawmhnawkte a paihna hmunah ngei paih thin ila. Thil engpawh mai hi a awmna tur hmuna a awmlo anih chuan bawlhhlawh leh hnawk a chang mai thin. Kan bungrua leh hmanraw chhehkhawmte mi dang tana hnawksak leh harsatna siamlo zawngin dah tum theuh ila. Kan hnuhmate fai tak leh fel takin kalsan theuh thin ang u.
Fur ruahtui a lo tlak hma ngeiin kan in leh vel a hnawmhnawk awmte i ti
fai theuh ang u.
Kan hnawmhnawk chhekkhawl tuihawk luangin a len chhuak a, tui luan kawr a hnawh thul nen. Kan nihna chiang taka langchhuakin kawngpui dungah te hnawmhnawk leh bawlhhlawh a inchhek vum ther thur thin. Kal hleihtheihloh khawp a kawng hnawhpingte a awm fo mai. Heng thil hi a thlen loh nan tun a tang hian tan ila thar ila, kan in bul vela tui luankawrte i thianfai theuh ang u.
Vengchhung kan tanrual a, theihtawp kan chhuah phawt chuan tun aia nasa hian faina kawngah hian hma kan la sawn thei a ni. A pawimawh ber chu kan rilru ngaihtuahna hi fai phawt mai sela chu chuan rah tha a chhuah ngei ang.
Mitlemte a vang hian veng hmai a bal thei a ni tih hriaiin faina kawngah ke pen theuh ang u. Tifaitu kan ni theilo anih pawhin tibawlhhlawhtuah zawng i tanglo hram ang u.
Bawlhhlawh reng reng a paihna hmunah ngei paih thin ila, sorkar bawlhhlawh paih motor hi a hmang pha chin chuan hman tangkai theuh i tum ang u.
Kan tuichhe paihna vantlang kawnga luantir mai lovin, kawr remchangah pipe thlunzawm a paih ngei nise. Motor workshop leh motor silna thli te kawngpui titawp leh kawngpuia luan tir mai mai hi chin loh tawp tur a ni.
Ran vulhtuten thenawm leh vantlang tana hnawk leh rimchhe lo turin vulh ila, kan ran vulhte khawlaiah tlat tir mai mai loh tur a ni. Thenawm leh vantlang tana tenawm leh rimchhe khawpin kan septic tank te a awm em tih hi enfiah fo tur a ni.
Kan in leh a vel a fai chuan a nuam a, hriselna kawngah pawh thui takin min pui thei a ni. Vengfai leh thianghlim neitur chuan a chhung a chengte hi kan pawimawh theuh a ni tih hi i hrereng ang u.
