Kan tang tlang dawn lawm ni?
Kan zoram siam tha a, kan khawtlang nun siam tha tur leh zonun zemawi
chhawm nung tur hian tanrual a pawimawh hle a ni. Zofate hmasawnna leh that tlanna tur anih beisei chung leh a tha zawnga hma kan sawn dan tur ngaihtuah turin pawl hrang hrang kan din a, hma pawh theih dan kawng hrang hrangin chak takin kan la theuh mai. Hei hian kan zonun zemawi thamral mai tur leh kan khawtlang tan a tha zawngin awmzia thui tak a nei a ni.
Kum tinin heng pawl hrang hrangte hian hruaitu kan thlang tliah tliah thin. Heng hruaitu kan thlan chhuahte hi mihring ve bawk an ni a, an hriselna
pawh a tha bik chuang lova, chhungkuaah pawh mawhphurhna sak tak nei anni tih kan hriatpui a tha. Hruaitu an nih vangin mi tha famkim, fel fai leh thiltithei chungchuang an ni bik lo, khawtlang leh pawl tan hmahruaitu tur chauh an ni.
Mi thenkhat chuan hruaitute sawisel kan ching thin. Insawiselna tur zawn
chuan tumah he khawvelah hian, mi famkim, sawisel kai lo tumah reng an awmlo tih hriat a tha. Kan Pathian Lehkhabu thianghlim ngei pawhin, ‘Tumah mi fel tak reng an awmlo, pakhat te mah an awmlo’ a ti. Mihring hi sawi sel kai vek, fel bik awm chuang lo, inang tlang kan ni. Mi sawiseltu nih hi thiltha ber a ni lo, thu rawn tha tak pe chunga an dik lohna hrilh hriat a tha zawk. Chak taka ke pen tur chuan insawisel aiin infuih tawnna hian thahrui min pe tam zawk fo thin.
Sawisel leh rel kai reng hruaitu nih erawh thiltha a ni lo. Kan diklohna te, kan tlin lohnate leh sawi sep kan kaina hrang hrangte insiamrem a, inthlak danglam thiam hi hruaitu tha chuan a tih ngei ngei tur a ni. Inthlak danglam ngamlo leh insiamtha theilo mi chu hruaitu ni tlak a ni lo. Thurawn leh thu kal lam leh haw lam dawng sawng thiam mi, mahni lansarh leh hmingthat t um lo, pawl tana inpe mi a ni ngei tur a ni.
Pawl chak leh chaklohah hruaitute an pawimawh rualin memberte pawh hian
mawhphurhna sang tak kan nei tih kan hre tur a ni. Hruaitu hnungzui tha peih mang silo, sawiselna leh phunnawina zawng ringawt, tha leh zung seng peih miahlo te hian pawl than a ti thu a, hmasawn zawng a ke pen a ti sak thin. Chuvangin kan hruaitute hnung hi rinawm takin kan zui tur a ni.
Kan tanrual phawt chuan tih theihloh engmah a awmlo, lungrual takin thawk
tlang ila. Tumah hi mahni in kan khawsa hrang tak tak thei lova, inmamawh tawn vek kan ni tih hriaiin inhmangaih tlang ila. Kan ram siamtha a, khawtlang nun tinuam tur hian mitin kan pawimawh theuh a ni. Midang tih atana khek mai lovin bul tantuah i tang ang u. Chu chuan rah tha a chhuah ngei ang.
