INTHENAWM KHAWVENNA
Mizo upate chuan ‘thenawm do aichuan khaw sarih do a thlanawm zawk’ an lo ti thin a. ‘Lam hla chhungte aiin thenawm khawvengte hi kan chhungkhat zawk’ te pawh an lo ti hial a ni. Mizo upate thufing leh serh leh sang thilte hi a zawng zawng chuan dik veklo mah se, a tam zawk hi chu a dikin a thu hi a fing bawk a ni. Hetianga tawngkam an lo chheh takah chuan keini thangthar chhuan lo awm zel turte pawhin kan zawm leh kan vawnthat tur tam tak a awm a, chung zinga pakhat inthenawm khawvenna chungchang hi kan ngaih pawimawh a tul hle a ni.
Mihring hi a huho a cheng a, khawsa kan nih avangin mahni chauhin a nun theihloh. Kan hausa viau emaw rethei berh tak, daikil kara mi pawh ni ila midang mamawhlo kan awm tlat lo. Eng kawng kawngah emaw chuan kan mihring pui, kan chenpuite, kan thenawm khawvengte hi kan mamawh thin. In mamawh tawn vek kan nih avang hian kawng engkimah kan inpui tawnin kan inti tha tlang tur a ni. Chuti nilova a kawhmawh bawl zawng leh huai kawm bawl zawnga kan khawsa anih chuan inthenawm khawvennaah nun hlim leh nun nuam kan nei thei ngai lovang.
Thenawm te nek ran mai, tai deuh reng thintu chu thenawm tha ani ngai lova. Bengchheng siamfo thintu chu huat rawn a ni thuai thin. Vantlang ram mahni ta bil a neih tum tlaltute, kawng nek zawnga mahni tanghma hai tlatte, vantlang rama bawlhhlawh paih mai thinte, kawng dunga tuichhe luan chhuahtirtu leh septic tank sah leh ngawt thinte hi thenawm khawveng sawisep an kai rangin, vantlang anchhia pawh an phur duh chawk.
Hausakna hre ran chunga thenawmte chaldelhtu chu thenawm tha a ni ngai lo, retheina hre ran chunga thinlung chapo ar chunga tawngkam mei nei chhak chhuak thintu nen ang khat reng an ni. Fin kherek, ar tial fin chhuahtu te, thu lei la leh thu deng khawng tak tak chhak chhuakfo thintu chu a thenawm tan phurrit a tling mai thin.
Inrel, insawichhiat leh inankhumna hian thiltha a thlen ngailo tih hriaiin sim hmak ila, kan diklohna, kan tlin lohna leh thiamlohna hrilh ngam kan nih theihnan leh tha taka lo dawngsawng thei turin inbuatsaih ila. Khawtlang thatna tana roreltute thu zawmte, tlawmngai pawl hrang hrangin kan thatna duha thahnem an ngaihna zawng zawng thlawp thatte pawh a tul ang. Kan mit leh beng a kan hriatte hmang hian insiamtha theuh ang u.
Hawh u, veng nuam kan nihna hi vawng nung zel ila, tun aia hma kan sawn lehzual theihnan keimahni theuha kan diklohna te, kan thiamlohna te, kan that lohna zawng zawngte hnawl ngam ila, veng nuam veng chhenfakawm leh inthenawm khawvenna tha lehzual nei turin tan ila thar ang u. A dik a piang te, a thangmawi apiang te, thatna reng a awm phawt chuan chu ngei chu ti ila. thatnain sual chu kan hneh zel phawt chuan kan inthenawm khawvenna hi a va nuam lehzual dawn em? Chu hun a lo thlen hunah chuan kan veng tluka veng nuam hi a awm ngai lovang.
