KHAWTLANG NUN SIAMTHAT
YMA chuan kumpuan atan ‘Khawtlang Nun Siam that’ kan hmang mek a. Kumin khawmpui hian enge kumpuanah a hman dawn, he kumpuan kan hmanlai hi hman leh a ni ang em, hriat a nilo. Kumpuanah meuh kan hmang a ni a, kan ram, khawtlang leh chhungkuate hian kan chhawr reng em? Khawtlang nun siamtha tura mawhphurtute hian insiamthat nan leh inenfiah nan kan hmang em le?
Khawtlang nun siamtha tak tak tur chuan pawimawh tam tak a awm ngei ang. Kan ram, khawtlang leh chhungkua siamthata a lo awm theihna tura pawimawh zual leh mawhphurtu bik han tarlang ila a tha awm e.
Nu leh Pa:
Engkim bul intanna chu chhungkua hi a ni. A tello chuan khawtlang leh ram a ding thei lo. Chhungkua a hotu chu nu leh pa hi an ni. Kan mawhphurhna hi a sang hle a ni. He ram, he khawtlang, he chhungkua dinchhuahna tur leh siamtha tur hian mawhphurhna sang tak kan nei a ni. A bul tan that chu a chanve zo tluk a ni tih angin chhungkua-ah bul kan tan that phawt chuan engkim hi a nuam lo thei lo.
Lalpa laka kan rochan fanau te kan kaihhruai dan leh zirtirna kan pek thinte uluk a ngai hle a ni. Zilh loh fa, zirtirna dawng tha lo leh inkaihhruaina fuh tawklo avang hian a lawm he khawtlang hi siam that a lo ngaih tak ni. Hetiang thil hi a thlen tawhloh nan chhungkua-ah bul i tan ang u. Nu leh pate kan insiamthat a, fate entawn tlak leh kaihhruai thei tura nun kan uluk phawt chuan thil thalo thleng thin tam tak hi chu kan pumpelh ngei ang.
Rual el chu a tha e, mahse rual kan el lutukna hian thil thalo, kuttlinglo a sum lak luhna leh Pathian hlamchhiahnaah min hruai lut suh se. Chu chuan rah tha a chhuah mawlh si lo. I fa i enkawl that loh chuan ramhuai talin a enkawl ang tih anih kha. Rahchhuah thei tur khawpin fanau enkawl uluk ila, zirtirna tha leh awmdan tur hrilh hria ila. Hei hian rah tha a chhuah ngei ang.
Thalaite:
Kan tun hun hi thalaite khawvel tia sawi a ni thin. Chuvangin khawtlang nun siamtha tur hian a neitu thalaite hi kan pawimawh takzet a ni. Engvangin nge kan khawtlang nun hi siamthat a loh ngaih tak? Thalaite’n kan zir loh vang leh khawvel par tlana awm vel kan chak vang a ni ber mai. Pathian pawhin kan thatlai hun chen chu a phal teh meuh mai. Kan Bible ngeiah pawh, ‘thalaite u, in that lai chen ula’ a tih kha. Helai thu chauh hi kan la vawng ang tih a hlauhawm. A thu tlipna kha i hre tel mawlh ang u, Pathianin kan chungah ro a rel dawn a ni tih hi i hre reng ang u.
Sualna chi hrang hrang, ruk ruk, hlemhletna, zu hmun hlimna, nulat tlangval kawnga sualna leh thilthalo dang zawng zawng siamtha a tibo tur chuan thalaite hi kan pawimawh takzet a ni. Keinin kan thawha bul kan tan lohvin tu in nge tichuang ang le. Heng zawng zawng laka fihlim tur leh midangte kawng dik kawhhmuh thei turin i inbuatsaih ang u.
Naupangte:
Nakin hun lo la awm tura khawtlang leh ram kaihruaitu turte hian tun atanga nun kan uluk a tul hle a ni. Nu leh pa thuawihlo, aia upate zahna chang hre lo, huai kawm bawl chingte hi mi dingchhuak an awm ngailo. Nun bul kan tan chhohnaah hian kan rah pelh loh nan i fimkhur ang u. Kan petek palh hlauh anih chuan kal ngil leh mai a harsa tawh thin. Chuvangin thilthalo kan hriat zawng zawngte tlansan ila, thiltha chauh i thlang ngam ang u. tun apanga nundan kawng tha kan zawh lo anih chuan inchhirin ban a la pel ngei dawn si a.
Khawtlang nun siamtha tur chuan engtiang pawhin, eng ang pawhin hma la sa teh ila, chhungkua-ah bul kan tan anih loh chuan a hlawhtling zik tluak thei ngai lovang. Chuvangin a chunga kan sawi tak te, nu leh pa, thalaite leh naupangte hrui khat vuana kan tanrual a pawimawh hle a ni. Kan tanrual that phawt chuan he khawtlang, he ram hi kan siamtha ngei ang.
