PASAL NEIH HNUAH HNAM HMING THLAK TUR
America mipui 71% chuan hmeichhiate hian pasal an neih hnu-ah an hnam hming (chhungkaw hming) hi an thlak tur ni-ah an ngai. Indiana University leh University of Utah-aa research beitute chuan hmeichhiain pasalte hnam hming an hman thin chungchanga mipui ngaihdan an zirchiang a; hmeichhia chuan pasalte hnam hming hi an tawm ve mai tura ngai America mipui zingah hian an tam hle tih an hmuchhuak a ni.
America hi hmeichhe dinhmun chawisanna ram niin, ‘chairman’ tih thin aiah ‘chairperson’ tih pawh an hmang uar hle a ni. Mipa leh hmeichhe intluk tlanna leh chhungkuaa mipa leh hmeichhiate dinhmun inang tura ngaihna te hi lian chho hle mah se hming chungchangah chuan mipa chuan ngaih pawimawh a la hlawh zawk fe niin he zirchiannaa an hotu Indiana University, Bloo mington-a sociology professor Brian Powell chuan a sawi a ni.
American Sociological Association annual meeting-ah he thil hmuh chhuah chung chang hi sawiin IU Bloomington saociology department-a doctoral zirlai Laura Hamilton chuan mi 815 zet an kawm niin a sawi.
Hmeichhiate hian pasalte hnam hming an la tur nia ngai an tam hle laiin mipa zingah hian a zatve dawn chuan nupui hnam hming lak ve mai an pawi ti hran lo niin a sawi.Mahse, mipain nupuite hnam hming lak ve mai an pawi ti hran lo tih an sawi rual hian a tak takah chuan an hreh hmel hle ni-a sawi a ni ve tho.
