THALAI THIHNA THLENG TAM BER
Tun hnaia Medical journal hriathlawh tak, Lancet-in a tarlan danin kum 50 liamta chhunga khawvel ram 50-a thihna thlen dan -chik taka chhui chian a nih hnuah, a hmaa nausen leh naupang thi tam ber ni thin kha, tunah chuan thihna hi thalai zingah a thleng tam ber tawh a; he’ng thihnate hi thahrum thawhna, mahni intihhlum leh kawngpuia tawhsual tawh vanga thleng a ni tlangpuiin a tarlang bawk.
Ram 50-a zirchianna an neihah hian hausa leh reitheite zingah pawh a kum telin hun lo taka thihna thleng thin hi a tlahniam vek a. A tlakhniam vek rual hian nausen leh nuapang zinga thihna hi a tlakhniam chak em vangin thalai zinga thihna thleng hi a sang ta ber a ni.
Kum 50 liamta chhung khan naupang kum 1 atanga kum 9 inkara thihna thleng thin hi hmun hrang hrangah 80% leh 93% inkarin a tlahniam a; chutih laiin thalai kum 15-24 inkar zinga thihna hi 41% leh 48% inkar chauha a tlakhniam avangin thalai thihna hi a thleng tam ta ber a ni. Zirchianna hi a fel famkim chiah lova; Africa ram thenkhat, indo tamna hmun, naupang thih tamna hmunah te data lak tur a awm mumal loh avangin chhut tel a ni ve lo a ni.
