TUIKUK LAKLETTE ENFIAH DAWN
Ramhlun North, the 10th September, 2011 : Joint Committee for All NGO’s leh Political Parties thukhawm chuan tuikuk helhovin Sakhan tlangdunga cheng Mizo um chhuahte zangnadawmna pek dan tur chu Bru Coordination Committee (BCC) lo sawi turah an ngai lo. BCC hian Sakhan tlangdunga cheng Mizo, tuikuk helhovin an umchhuahte zangnadawmna Rs 80,000 pe turin Home Ministry an lo ngen tawh a, hemi chungchangcah hian BCC chuan a tih loh tur an ti niah Central YMA President kaihhruaia Mizoram NGO lian pali : YMA, MZP, MHIP leh MUP bakah political party hrang hrangte joint meeting chuan an ngai.
Tuikuk helhovin an umchhuah Sakhan tlangdunga cheng Mizote hi India sorkar chuan zangnadawmnaa a pe dawn a nih pawhin in leh lo leh huan thlai an chan takte nena inmil tawk a pe tur niah an ngaih thu an sawi a. Zangnadawmna hi an hruat rual a nih pawhin Rs 80,000 chu a beitham deuh ni an ngaihthu an sawi bawk. Mizoram sorkar chuan tuikuk helhovin an umchhuah Sakhan tlangdunga cheng Mizote chu India sorkarin zangnadawmna a pek phut avangin tripura Camp hrang hranga awm tuikuk laklet leh hna hi kumtir lam deuh khan a lo chawlhsan tawh a, India sorkarin a thil phut a tihhlawhtlin hma chu tuikuk hi laklet leh a tum rih bik lo a ni.
NGO leh political party te chuan June thlaa an lo rel tawh Mizoram sorkarin Tripura atanga tuikuk laklet tawhte an awmna hmuna tlawh a, Mizoram mi dik tak an nih leh nih loh zuk enfiah an lo rel tawh chu September thla chhung hian tihpuitlin nise an ti a, a senso tur hi sorkarna chang mektu Congress party in an tum dawn a ni. Hemi chungchang hmalak zuina tur joint meeting in an ruat CYMA leh MZP te chuan ruahmanna an siam fel nghal zui bawk, September 19 hian Aizawl atangin an chhuak nghal ang a, group thum-ah inthenin group tinah hian pawl tin aiawh mi pahnih zel an tel ang a, chawlhkar hnih chhungin tuikuk laklet lehte awmna hmunte hi tlawhchhuah vek turin ruahmanna an siam a ni.
Mizorama hnam thenkhat duhsak tak leh MLA an neih theihnan thiam taka ruahmanna siam nia ngaih theih tura Assembly Constituency awmdan siksawi a tum tum pawha NGO lian palite leh political party hrang hrang te hian Save Mizoram Committee an din a, chu Committee hmalakna avanga Delimitation Commission pawh mumal taka siam a ni a, assembly constituency awmdan pawh tuna mi anga a lo chhuah hnuah hian Mizoram pum nghawng thil, pawl leh party mal tana hmalak mai chiah an hriatlohte ngaihtuah turin NGO leh political party te hian joint meeting an nei thin a ni. Joint meeting hi a kotu tur bik leh a kengkawhtu bik an awm lo a, a thu a zirin NGO pali zinga a eng emaw ber hian an ko mai thin a, chu chu a huhovin tihhlawhtlin tumin hma an la thin a ni. tuna joint meeting an neihah pawh hian an kal kim hle.
