ENGLAND BUAINA
Indopui 2-na hun laia Hitler-a thlawhnate’n London an bomb chiam hun lai bak kha, tun tum anga a ruala London khawpuia mei alh a chhuah nasat hi a awm leh lo hial awm e. Tun kar tir lama chhova London leh UK-a khawpui thenkhata thalai sahawkin buaina siam a, police bei a, dawr, In leh lirthei an pawng beih chiam ang renga nasa hi tun hnaiah sawi tur a vang hle a ni.
He mipui sahawk (riot) hi kar liama Ningani-a police-te’n drugs zuar thin leh gang member pakhat, Mirk Duggan (k. 29) an kahlum atanga lo irchhuak a ni a. Police-te hi ralthuam keng thinte laka beihpui an thlak lai a ni a; London khawpuia veng tawp zual leh pawikhawihtu tam zawkte chenna hmunah an rinhlelh zualte ti dingin, an dap thin niin an sawi.
He mihang, Mark Duggan hian police-te chu a kah avangin an kap hlum ta niin police lam hian an sawi laiin, chhui chiannaah chuan a silai chu a hmeh puah chiah leh chiah loh hriat theih a ni lo, tih a ni a. Mark Duggan-a chhungte lam erawh chuan ralthuam a keng chhuak ngai lo niin an sawi thung.
Hetianga ralthuam keng lo (nia hriat) police-ten an kahhlum duh loh entirna atan Mark Duggan vui liam a nih zawh, Inrinni liamta khan a chhungte leh mi thahnem tak chuan, an chenna veng atangin Tottenham police station thleng kawng an zawh a; a tir chuan boruak pawh a muanawm hle niin sawi a ni.
Mahse police lamten mipui an lo dawnsawn dan leh an lo ngaihsak danah lawm lo an awm a ni chek ang a; thenkhat chuan a bul hnaia police motor thekhat chu a hal ta a. Thu chak takin a taidarh zel a, London khawpui hmun hrang hrangah thalai sakhaw inhawrkhawmin, boruak chu chak takin a lo chhuak ta niin sawi a ni a. Tun kar tir lam chho khan London veng hrang hrangah buaina nasa tak a chhuah mai bakah, Britain khawpui thenkhat, Manchester, Salford, Liverpool, Nottingham leh Birmingham-ah te pawh a kangkai ta zel a ni.
Buaina a chhuah sarhu tak tak lai kha chuan sipai pawh koh luh mai duhna a awm thut thut a. Heng sipai-te hian kang thelhna tui nen mipui sahawk hi phuh se buaina pawhin zia lam rang taka a pan ringtu an tam hle a; tunah tak erawh chuan sipai-te hi hman ngaia ngaih a ni tawh lem lo a ni.
Tun tuma Britain khawpui hrang hranga buaina lo chhuak hi Mark Duggan kah hlum a nih vang piah lamah a chhan ril tak a awm thei awm e. London veng thenkhat-a cheng, a bik takin English mi ni lote hi rethei ve tak tak, hna nei lo leh beidawng ve tak tak an ni hlawm a; mi In luaha khawsa ve naw naw leh, ruihtheihthil zuar a, gang member-te pawh tam tak an awm awm e.
Hetih lai vek hian Metropolitan Police-te chu heng mi harsa leh khirh ve tak tak chunga inlek dan leh an hawiher te chuan sawisel a hlawh ve hle tho niin thil hre zawkte chuan an sawi. Police-te hian hmusit leh hnuaichhiah takin an chhawnchhaih fo thin niin sawi a ni a. Kum 1998 atang khan police kutah mi 333 an thi tawh a; heng zinga a tam zawk hi mihang niin, heng thihna thleng avang hian police pakhat mah court-a hruai an la ni lo niin sawi a ni bawk.
