ZAN REIAH BENGCHHENG SIAM LO’NG U
Tunlai hian vengchhung hmun hrang hrangah zanrei tak tak thlenga thukhawm thin rawlthar rual engemaw zah an awm a. Heng mite hian a bul hnaia mite tana mut harsa khawpin bengchheng an siam thin a. Thenkhatte phei chu mi bathlarah zu rui chungin an awmkhawm thin a, aia upa zah nachang an hre hek lova, hauh leh zilhhauh pawh an sawt lo hle a ni.
Vawi engemawzah hetianga rawlthar bengchheng report hi MARYMA chuan kan dawng tawha, tun chinah chuan hetianga zan tairek thleng thlenga bengchheng thinte hian lo sim tawh turin kan han chah nawn leh che u a, nu leh pa te pawhin kan fate tihtur pawimawh nei lova khawlai vak mai mai leh rel tur engmah nei si lova thukhawm lawt lawt thinte hian thil tha aiin thalo lam an zir nasa zawk tih hriaa hei aia kan khuahkhirh a tha hle ani.
Heng mite vai tur leh a tul ang anga zilhhau tur a JAC leh veng pate thawhchhuah hun hi a thlen ngai lo turin rawlthar leh thalaite kan inngen lawk a, duty tur hian bengchheng ning tak tak vengchhung pa leh tlangval engemaw zah an awm tih hria a lo inthiar fihlim tawh turin kan han inngen lawk a ni e. Mimal zalena chhuanga khawlaia bengchheng siam thinte hian kan zalenna in midang a tihbuai a thiang chuanglo tih kan hriat a hun tawha, kan khawtlang leh ram tan hian enge ka tih ve theih tih ngaihtuah a, kan theihna zawn theuha mi tangkai nih tum hi tun ang khawvelah chuan a hun tawh hle ani.
