Kumpuan hawn a ni ta
(Khawtlang nun siamtha tur hian tute pawh kan pawimawh)
Dt. 16.2.2011 khan Central YMA buatsaihin kumpuan ‘Khawtlang nun siamthat’ hawnna inkhawm Vanapa Hall-ah neih a ni a. Khawpui chhung branch 92 atangin he inkhawmah hian member 400 chuang kal khawm ani a, Kumpuan hi YMA member mai bakah Mizo mipui zawng zawngten kan hlawkpui theuh atan Pu Lal Chungnunga President chuan a hawng ani.
CYMA President Lal Chungnunga chuan, “Misual taimakna hi kan khum lo a nih pawhin kan umphak a ngai a ni” a ti a, Tuikuk chungchang sawiin, ‘sorkar kan nghak ang’ a ti a. Mizoram thendarh phal a nih loh turthu sawiin, “Kan pipu te khan Mizoram then an phal ngai lova, Mizoram map hi bun a ni ang tih ka hlau” tiin a sawi bawk.
Lal Chungnunga chuan kumpuan atana khawtlang nun siamthat hman a nih chungchang chu sawiin, ‘Mizote khawtlang nun a chheta em a tih vanga he kuampuan hi neih a ni lo’ a ti a. ‘Beidawnthlak khawpin kan ram hi a chheta tihna a ni lova, beidawng lovin beiseina nen kan thawk ang’ tia sawiin, ‘khawtlang nun siamtha tur hian tute pawh kan pawimawh’ a ti bawk. ‘Khawtlang nun tichhetute hi an tam lo, mahse, an thawm a ring a ni’ a ti a. ‘Pawngsual leh inawhhlumah kan sang tlat hi khawtlang nun tichhetu a ni’ tiin CYMA president chuan a sawi bawk.
Kumpuan hawnna ah hian Pu Vanlalruata Asst.Secretary CYMA leh Pu Lalbiakzuala General Secretary CYMA te chuan khawtlang nun siam that kawnga ‘Do ngaite’ tih leh ‘Nunpui tur leh inzirtir ngaite’ tih thupui hmangin thu an sawia. Kumpuan Secretary Pu Lalsangzuala Sailo chuan report pe in nikum Lunglei YMA General Conference atanga tun thlenga ruihhlo man tawh zawng zawng chu Rs. 165,78,629.00 anih tawh thu leh ruihhlo leh sualna thil dang kaihhnawiha an mi man tawh mi 474 te chu Synod Social Front nen tangkawpa counselling an pek tawh thu te, heng zinga thenkhatte chu Home/Centre-a dah a, a then Police leh Excise-a an pek thu a sawi ani.
He inkhawm hi Mami Varte, Mimi Renthlei leh HC Sanglura ten zaiin an awi a, Tuarpuii te thian dunin fiamthu zirtir neiin mipui an ti hlim bawk ani. Kan Branch atangin Pu H.Lalruatliana Secretary, Pu Singliana, Pu C.Lalnunmawia, Tv Remruata Renthlei, Pu F.Lalengkima leh Pu Malsawmdawngliana te an tel ve ani.
