OK

- Lalremruata Renthlei

Tawngkam tlanglawn a ni a, nitin vawi tam kan sawi thin. ‘ok‘ tih thumal hian khawvel a hneh a ni.

Khawvela tawngkam hriat tlanglawn leh pawm ber a ni a, hnam tinin kan hriatthiam a ni ber ang chu. Chumai a ni lo, thil sawichhuahnana kan tawng hman zinga upa ber a ni hial bawk ang a, a lar em avang hian a hlutzia kan chhut thinlo mai zawk a ni.

Lam tawi a ang lek lek a, acronym a ni. Kan lam pawh hian ‘ock’ tia lam lo hian letter O leh K hi kan lamchiang viau. O lam kual lai chiah hian chiang deuhin K hi kan lam ri a ni. Internet-ah phei chuan KK emaw K tiin emaw a lam tawi anla hmang leh zui.

Ziakah leh tawngkamah OK hi a chiang hle a, thumal dang aiin a chiang bik hle. A danglam lehna em em mai chu eng aw phawi pawh hian a rem vel vek mai hi a ni.

Linguist ho chuan tawng chitin deuhthawah O hi vowel a ni vek a, K hi consonant a ni vek bawk. OK chu thumal danglam tak, lam awl a nih bawk si avang hian a lar zual phah a ni, an ti.

Tawnglama mithiamte chuan OK te ang chi tawngkam danglam lutuk hi chu tawng chhungah an seng lut duh lo khawp mai a, mitina kan hriattlan theih leh pawmtheih hi a pawm tlangpui a, OK erawh hi chu a danglamna tak leh awlsam tak si a nihna hi a danglamna chu a ni ta zel a ni.

Hnam tin leh tawngtin hian tawngkam awlsam tak leh thil sawina chherchhuah hi a tum vek nia sawi a ni a. Mahse, a hunlaitea a lar tih bak chu hman zui a hlawh thin lo.

Kum 1830 tawp lamah khan Boston, Massachusetts, USA ah newspaper editors te chuan tawngkam bungraw thar chherchhuah an intihmuh hle a. Chung zingah chuan “WOOOFC” (with one of our first citizens) tihte chu an hman lar pawl a ni.

An tawng bungraw chher thar tam tak chu hman zui a ni lova. Mahse, chu’ng te chu OK tobul te anni thung.

23 March 1839 khan OK tih tawngkam chu khawvel piantirh ata hman tan niin Boston Morning Post chanchinbu phek hnihnaah paraghraph sei tak karah hman tan niin O.K. (all correct) tiin an hmang tan a. Chu tawngkam chu tawngkam danglo ang takin a dam khawchhuakta a ni.

Kum 1840 a America ram president inthlan chuan OK chu a tilar zual bawk a. Candidate pakhat nickname chu Old Kinderhook a ni a. Chutih hunlai chuan thuthang dik lo thehdarh a ni a, American president chuan chu candidate hming chu a lam fuh hleithei lova. All Correct tihna emaw tia pawmin document chu a pawmpuita a, an ti.

Chuta chin kum sawm chhung chu OK tih thumal chu document tam takah an hmang tan a, telegraph thawnnan an hmang bawk a, tawngkam awlsam thil sawifiahnana tha si a nihna chuan a tilar a ni ber. Mahse, sumdawnna leh tawng tlanglawnah bak an hmang duh lova. American writer te phei chuan an hmang tha duh lo hle a, slang (tawng ler) uar tak Mark Twain meuh pawh khan OK tih a thu ziakah a hmang miah lo an ti bawk.

20th Century chuankai a nih meuh chuan OK chu a larta hle a, slang ang pawha ngaih a ni ta lo hial a. Inbiakna tawngkama lar ber ni chhota a ni.

Thenkhat chuan Choctaw Native American language atanga lak niin ‘okeh’ (a ni e) an ti a. US president hlui Woodrow Wilson khan a document pawm pakhatah okeh tih a ziak an ti bawk.

OK ti ema a larna chhan chu tun hma 1890 hmalam chuan English tawngah a kar awl tikhattu ber chu “yes”, “good”, “fine”, “excellent”, “satisfactory”, leh “all right” tih a ni thin a. Heng tawngkamah te hian ‘neutral’ a awm lova, OK erawh chuan ngaihdan sawi kher lovin a ti ‘neutral’ ta a, anti. Entirnan…

Chtea : ‘Vawiin tlaiah inhmu ang’
Asawma : Ok.
Chtea : ‘Vawiin tlaiah inhmu ang’
Asawma : ‘Tehreng mai’ emaw ‘Inhmu ngei ang’ emaw ‘Kan inhmu dawn nia’

OK chuan a laiah la in aw/aih ti loin neutral takin, awlsam tak si, pawm theih siin alantir bik a ni. Sap tawngah chuan, “how well are you feeling?” tih ai chuan “are you OK?” tih khan a felfai mai.

President Obama pawh khuan kum 2009 a school naupang hnena thu a sawinaah “That’s OK. Some of the most successful people in the world are the ones who’ve had the most failures.” a ti. British prime minister David Cameron phei khu chuan OK hi a hmang uar hle.

Heti khawpa tawngkam lar leh awlsam si, thil tam tak sawina nisi hian len lohna a ne ve tho. Thusawi tur ziah chhuahsaah reng reng OK hian hmun a chang ngau lova, formal speeches kan tih reng rengah OK telh a ni ngai lo bawk.

Bible pawh hi tunlai English-a lehchhuahah pawh OK hian hmun a chang chuang lova, lehkhabu tam takah pawh OK lan miah lohna hi a awm teuh tho. Mahse, english hmanga inbiakna hi zawng OK tellova puitlin hleitheihloh vek a ni.