NGAIHSAN TUR DIK
Chhak leh thlang atangin lemchan leh rimawi khawvelin min run a, thalaite min chimpil thaw thawng tawh a ni. A tha lam seng lut ta lo chuan kan phak tawk entawnin sam zuah sei, kawr awm inhawng zau hek hawk leh pawnfen chhing te, kekawr kap fual nen kan lo inchhek arbawm ve a. Nalh pui chu lo awm bawk mahse kan zavai chuan kan nalhpui kher lo. Kan nun a pawlawh sâwt a, kan chapo âr a, aia upa zahna phei chu kan tlachham takzet tawh a ni.
Hetiang anih mek laiin kan ramah reality show chi hrang hrang cable network kal tlangin kan hre thin a. A tam zawk chu hetiang lamah kan thle leh nghal dual a. Zan khaw tai rek thlengin kan meng a, a chhuah hunlai chuan thildang ti hman lek lovin kan hun hlu kan paih liam char char bawk. Ka ui ka âr tia min chhawmdawl zuia min hrai puar lek lo turte tanin taipawng pawngin kan phi ruai a, kan la inhnial phah rawl nen. Kum hnih khat em pawh a vei hma a kan theihnghilh zui leh mai turte tan theihtawp kan chhuah a, enge a hlawkna aw!
Kan nundan, rilru put hmang leh ngaihsan zawng hi kan thlak danglam a hun tawh viau a ni. Nu leh pate’n fate ngaihsak hman lek lova kan thil buaipui thin te, thalai leh naupang lamin kan zirna leh eizawnna kawng thlahthlam thak phah nana kan hman hian engthil nge min pek a, eng dinhmunah nge min hlan kai dawn? Chhut chian a tul tak meuh meuh a ni. Kan ram dinhmun kan hre theuh a, thawhchhuah leh thar chhuah neilo, chawm hlawm state kan ni. Lemchan leh rimawi khawvel a eizawng tur chuan kan nundan leh khawsak phung hian a la tlin rih lo. Lo tlin ta teh reng pawh nise hlawhtlinna tak tak phur chhuak tur chuan lehkhathiamna a pawimawh. A bul thuma kan fuhlo anih chuan hlawhtlinna a zik tluak tak tak thei lo. Chuvangin lehkhathiam ni turin taimak i chhuah lehzual teh ang u.
Eng thil pawh ti la, eng eizawnna kawng pawh zawh dawn la, hlawhtlinna duh tak tak tan chuan lehkhathiam hmasak phawt a pawimawh. Lehkha thiamna chuan finna, zahawmna, remhriatna, chhia leh tha hriatna, duhthlanna dik, awmdan mawi leh kawng tha a kawh hmuh ngei ang che. Lehkha thiam kher loh pawhin ei chu a hmuh theih teh meuh mai. Mahse kut hnathawk i ni emaw infiamna kawng i zawh dawn emaw rimawi khawvelah i zuang lut emaw lemchanna tualah i che vel duh anih pawhin lehkhathiam phawt teh. I talent tihpun dan kawng i dap thiam sawt anga, hlawkna leh hlawhtlinna sang zawkah a hlang kai ang che a, mi hnuaichhiaha i awm tur a veng ang che. Lehkhathiamna chuan finna khurpuiah a hruai lut ngei ang che.
Zaithiam te, inkhelh thiam te an ngaihsan awm e. Pathianin talent a pek an hmang tangkai a ni. Infiammi leh zaithiamte chawimawi nan a khaw nawtin kan hmuak a kan chawimawi thin anih chuan engvanginnge lehkhathiamte hi kan tih ve loh ang? Thenkhat chu an talent dawn pawh a ni thei e, thenkhat ve thung chu rilru chaklo tak, thi leh thau pawlh a taima taka an beih fan fan avanga thiamna phur chhuak an ni asin. Hei lo liam enge ngaihsan tur dang awm chuang le. Kan ngaihsan zawngah hian kan mizia leh nihna thui takin a lang thin. He khawvel kan awmchhung reiloteah hian ngaihsan tur dik hi i thlang thiam ang u. Engkim a engkimah hian lehkhathiamna hi a pawimawh si a.
