Beih hram hi hlawhtlinna
- MARYMA Editorial
Kum danga kan lo tih thin tawh angin HSLC leh HSSLC Pass tharte lawmpuina hun neih a ni a, kan vengchhung atangin top 10 a lang zirlai 3 lai kan nei hi a ropuiin a lawmawm takzet a ni. Zirlai exam beitu hlawhtlinna chang kan thahnem hle a, hei hi hmasawnna tha a va ni tehlul em.
Zirlai kan ni emaw nilo emaw mitin hian kan hmalam hun atan hian mawhphurhna kan nei theuh mai a, he kan mawhphurhna hlen chhuak tha apiang hi an hlawhtling thin. |henkhat chu hrereng chungin kan ti tha peihlo a, kan nih tur ang kan nih theihloh phah fo thin a ni.
Kan thawhrah a lo chhuak a, mahni duhthu ngei a kan thiltih tawh a lungawi leh si lo, vuivaina zawng kan awm thin? Heng mite hi mi fel leh fing an ni ngai em le? Thawhrah sengtu tur chu keimahni theuh hi kan ni tih hrereng ila, ‘Thir chu a lin laiin deng rawh’ tih angin a hun laia taima taka engthil pawh kan tih hian hlawhtlinna rah chu seng a ni thin.
Thawhrim a hlawhtlinna hmuh hma chuan nawmsakna hian hma khalh lo hram rawh se. Chhungte thawh chhuahsa a in lak vungte leh nuamchen a hun hman hian rah tha a chhuah ngai lo. Nawmsaknain hma a hruai ngat hi chuan hlawhtlinna ropui tak min thlenpui duh lo viau a ni.
Fanghmir chuan nipui laiin thlasik a an ei tur an chhekkhawl thin a. Mifing chu a hunlaiin rim takin a thawk thin. Buh sengtu pawhin a hunlai a taima taka a sengkhawl loh chuan a buh vuite a til zova, zuva te’n an eizo mai thin. Mifing chu harsatna hun atan a inring thin a, a tuarchhuak a, a hlawhtling nge nge thin. Mi zawmthawh chuan a peih lova, a hahdam zawng leh pumpelhna a zawng chamchi a, a tawpah lungngaihna leh beidawnna ruamah a tlu lut a, a hlawhchham mai thin.
Hun kal tawha kan thiltihah kan hlawhchham palh a ni thei e. Beidawngin kan in dawm kun mai dawn em ni? Hnai love, bei la bei nawn rawh tih a nih kha hrereng ila. Beidawnna hi inhneh tir ngai suh ang u. Kan hlawhchhamna hi min tuai hriamtu hmanraw tangkaiah chantir ila, min ti tang thartu, chakna thar min petuah chantir hlauh ang u.
Kan hun hman mekah hian inbuatsaihna tha tak hnuaiah insiamthat a tha, fimkhur taka hmasawnna kawng dik zawh turin ruahmanna siam a tha. Hun kal tawhah inchhir mahila, siamthat ngaihna a awm tawhlo a, chuvangin tun hun atang hian rilru buatsaih a tha. Taima taka hrehawm tam tak tuar chhuak a, bei hram hramtu hian a tawpah hlawhtlinna an chang thin.
