KEI NI VE HI
1946-ah Mizoramah Mizo Union a ding a, chu chu Mizorama political party hmasa ber a ni. Chumi hnu lamah chuan democracy hmangin kan inrelbawl ta a, democracy rama kan awm chu kan vanneihna tak pawh niin kan sawi thin.
Democracy hmanga kan thlantlinte’n ro an rel a, democracy hmanga kan thlantlinte leh an mirin zawng te’n hna an thawk ta a ni. Mahse, kan dinhmun erawh a tha lo hle. Pawisa a pung a, kan chhe telh telh thung emaw tih mai tur a ni. Pawisa tam tak neiha rorelna tha lo tak hmanga ‘chalai’ ai chuan rorelna tha hmanga pawisa tlemte ‘chalai’ kan mamawh zawk niin a lang.
Mizoram budget a pung tih te, TV leh car a pung tih ang chite chu kan hruaitute tuipui zawng a ni a, ‘kan changkangin kan nuamsa ta ngawt mai’ tih te chu hruaitute mai ni lovin mipuite pawhin chhuang taka kan sawi duh dan a ni. Heng hian hmasawnna lam a hawi em? Nawmsakna lam chu a hawi ngei a, hmasawnna lam a hawi meuh ang em?
Democracy hnuaia kan sorkar hi eng ti kauva tangkai turin nge kan beisei? Pa tha huau huau deuh, sum ngah zet, thil phal deuh niin kan hria a, a thiam thiamin an hlawkpui mai turah ngaiin, mahni zawn theuhah kan bei ta suau suau mai niin a lang. A thenin sorkar hnathawk ni-a sorkar hlawkpui an tum a, a thenin contract leh supply hna thawka hlawkpui an tum a, mahni remchan dan leh thiam dan ang anga hlawkpui kan tum hlawm. Chutia sorkar zarzotute chu mi hlawhtling tia sawi an ni ta mai em? Politician-te pawh ram tana inpete ni lovin politics hmanga sorkar hlawkpui tuma beitute an ni mai em? Kan zinga a kawlhrang leh huaisen deuhte’n heti zawnga sorkar hlawkpui an tum a ni mai em? Inpe tak tak chu pahnih/khat emaw chu an awm ang.
Chu rilru pu chuan ro kan han relin kan khawsa ta a, hlawkpui ngiang ngiang chu an awm reng a!
Kan hmalaknate hi ram leh hnam tana tih ni lovin tute emaw hlawkpui tura tih a ni deuh zel mai tiin a duh tan chuan a sawi theih ang. Sorkar hnuaia hna (post) kan siam te pawhin ‘he post hi siam ila kan ram kalsiamin a hlawkpui ang a, hma kan sawn sawt ang’ tih rilru pu lovin, ‘he post hi siam ila he mi hian sorkar atangin thla tin hlawh a la ve thei ang’ tih rilru kan pu ta thin a, chu rilru chu kan chhiatpui nasa tawh hle.
Chutiang vel chu kan nih avangin, mipui zingah rethei ngawih ngawih an tam hle laia mahni hlawh tihsan inthlahrung turin kan pute hi beisei chi an ni em? Sorkar hlawkpui tuma naupan lai atanga lehkhazir kan ni vek mai lo’m ni? India ramin buaina a hmachhawn mek, India Against Corruption an ti, an hlawhtling ang em tih erawh hriat a nilo. Thil chiang tak awm erawh mipui te hian politics chhemi hi kan ning a, induhsak chungchuan te, mitlemte chauhin sorkar chhawr te, a tithei bik awm leh hlawkna atan chauha politics khelte hi kan kham a ni. Kan kham tih hian Mizoram chauh a ni lo, India ram pumpuiin a kham a, siamthat duhna a lian a, political party-ah mipui beidawngin civil society angin movement a kal mup mup kan ti thei awm e.
He ram hi a kal dik tial tial a, a kal fuh tial tial bawk ang. Mipui kan fing tial tial a, tuna kan buaina ber chu kan duham lutukna avanga tihlawm theih kan tam lutuk hi a ni. Thil tihsual pawina ber chu mahni chauh nilo midang a nghawng tel tlat hi a ni.
