KHAWTLANGIN MIBO ZAWNG
Ramhlun North, the 20th August, 2011: Kan vengchhunga mibo Vungzakhuma (VZ-a) chu Chite luikamah thia hmuh a niin vawiin hian kan veng thlanmualah vuiliam nghal a ni.
Ramhlun North Local Council leh Branch YMA Executive Committee in kan veng mibo, Vungzakhuma (30) c/o K.Zahmuaka, Chawngbawla Section chu ni 20.8.2011 (Inrinni) nilenga zawn tura a rel angin khawtlang huapin vawiin hian Aizawl hmun hrang hrangah zawn a ni a, mi 353 (V.Sec – 128, C.Sec – 116, K.Sec – 98 leh vengdang 11) zet kan thawkchhuak a ni.
Vungzakhuma hi ni 9.8.2011(Thawhlehni) zing tuktuan ei dawn vela in atanga chhuak a ni a, chhungkua leh thenrual tha ten hun reitak an zawn tawh hnuah beidawngin khawtlang huapa zawn a ni ta a ni.
Mi tlawmngai thawkchhuak ten ruahmanna fel tak siamin hmun hrang hrang 12-ah inthendarhin mibo zawn hna hi kalpui a ni a. Vengchhung mi tlawmngai te a zawnna tur lirthei thawh an awm nual a. Car 6, Taxi 2, Bolero/Scorpio 2, Gypsy 3, Pick up 2, 207 1 leh 2-Wheeler engemawzah thawhchhuahpui a ni.
Bialtu Minister H. Liansailova chuan mibo zawngtute thingpui lumna tur Rs.1500/- min pe a, minister Pu H. Rohluna pawhin Rs. 2500/- min pe a, Pu John Lalnunsanga’n Rs. 1000/-, V-Sec, Pu K. Zahmuaka’n Rs. 1000/- C-Sec. leh Pu J.L. Hnuna’n Rs. 500/- C-Sec. te’n min pe bawk.
Mibo zawng hian Aizawl leh a chhehvel hmun tin deuhthawah inzarpharh hman a ni a, Ramhlun North thlanmual mawng – Chite leh World Bank Road lama zawng tura tih Group ten an hmu ta a ni. Vungzakhuma hi a taksa a chhe hman hle a, khawtlang hruaitu ten thil pawimawh tihfel ngai ang ang tifela buaipuiin vawiin ni vek hian kan veng thlanmuala vui nghal a ni ta a ni.
Vengchhung thalai leh patling kan thawkchhuak tha hle a, tlawmngaia thawkchhuak zawng zawngte chungah leh a zawnna atana mimal sum seng leh lirthei thawhchhuahpuitu zawng zawngte chungah Ramhlun North Local Council leh Branch YMA chuan lawmthu a sawi tak meuh meuh a ni.
