KAWNGPUI DUNG SENGHAWI MEK
YMA ten kan ngenna angin Local Council chuan kan veng chhung kawngpui dunga motor, dawr bungrua leh sumdawna thil hnawk zualte senghawiin hma a la mek.
MARYMA a kan chhuah tawh ang khan kan veng chhung kawngpui dunga motor dah, vantlang tana him lo leh hnawk zualte leh sumdawnna hmun thenkhatte hian kan kawngpui a tichep hle tawh a. Rikrum thil, a bikin kangmei chhuah palh thilah pawh chhanchhuahna hna thawh tiharsa tur a tam hle. Hengte hi engemaw chen a ziaawm theih beiseiin YMA chuan Local Council te hma la turin a ngen a. He ngenna ang hian Local Council chuan zan engemawzat survey an neih hnuah YMA hruaitute nen ni 21.7.2011 zan khan khawlai an fang a. Motor neitu engemawzat hnenah an motor hung sawn tura hriattirna leh ngenna lehkha an pe a ni. Thenkhat erawh chu an motor hun dan tidanglam hret turin tawngkama ngen an ni bawk.
Hetih lai hian lehkha pek awm tak pek ve loh pawh kan awm nual tho tih kan Local Council te hian an hria a. Lehkha kan dawn ve loh vangin kan motor hun a hnawk lo tihna a ni lo tih hriain lehkha pek kher nghak lova kan hungsawn thei a nih chuan a lawmawm hle ang. Hmalakna hi lak chhunzawm zel a ni dawn a ni.
Vawiin hian Local Council Memberte leh YMA hruaitute hi Main Road lama dawr leh sumdawnna hmun hnawk zualte leh motor inhung hnawk zualte enfiahin an thawk chhuak leh bawk.
He ngenna ngaipawimawh hian mi tamtak chuan an motor-te an hung sawn mek a. Kan khawlai kawngpui te a thawl nuam sawt hle a ni. Khawtlang hruaitute ngenna ngai pawimawha mi tam takin an in lo ram awla sum senga garrage an siam tawh hnu leh mi garrage pawh man chawia an luah tawh hnu hi chuan vantlang tana hnawksak tling a, kawngpui dunga motor hun fo hi kan chin loh a tha hle a ni. Tin, kan insakna bungruate kawngpuiah kan chhawp lo thei lo a nih pawhin, rang taka senghawi thin tur pawha beisei kan ni.
