SEX LEH NU LEH PATE THU HLA
Thalaite hian nu leh pa thu hi an ngaichang tha duh lovin, anni ai chuan an thiante emaw, milar te emaw thu leh hla an tuipui zawk niin ngaih a ni thin a; a bik takin mipat hmeichhiatna chungchangah phei chuan chhungkaw pawn lamah an inzir nasa zawka ngaih an ni thin.
Mahse tun hnaia University of Montreal (Canada)-a professor of pediatrics tang lai leh, Canadian Paediatric Society president ni lai Jean-Yves Frappier leh a hote’n research an beih atanga a lan danin, vantlangin thudik awmsa anga kan lo pawm ngawt thin hi a lo dik vek kher loh hmel khawp mai. An hmuhchhuah dan chuan thalai za-a sawmli panga (45%) laiin nu leh pate hi mipat hmeichhiat-na (sex) kawng chi hrang hranga an entawn ber leh an thu leh hla an ngaihchanna ber niin an sawi a; thiante emaw, milar-te emaw entawn aiin an tam fe zawk a ni.
He zirchiannaah hian thalai kum 14 atanga kum 17 inkar mi 1,171 bakah, thalai fa nei lai mek nu 1,139 laite chu zawhna chi hrang hrang zawh an ni a. A bik takin sex hriatthiamna chungchanga an changkan leh changkan loh te, sex an hman dan te, chungkaw kalphung te, sex chungchanga thu leh hla an dawnsawnna te ngun taka zawh chian a ni a; hengtiang bakah hian ngaizawng chungchang te, inrim dan phung te, fa neih theih lohna hman chungchang te leh thil dang tam tak zawhchian an ni bawk.
Zawhna chi hrang hrang an zawhah te hian chhanna dik ber chauh thlan tur tih a ni lem lova; dika an hriat phawt chuan a chhangtute hian chhanna pakhat aia tam pawh an chhang thei a ni.
Thalai tam ber, 45% lai chuan an nu leh pate chu mipat hmeichhiat chungchanga an entawn ber leh thurawn an lakna ber a nih thu an sawi a; chutih lai vekin 32% chuan an thiante an rin zawk thu sawiin, zaithiam/film-star atanga thurawn la 15% an awm a, sports-star/TV star atanga thurawn la 7% an awm bawk.
Hetih lai rual vek hian thalai zinga mipat hmeichhiat hmang nasa ber berte zingah sex chungchanga nu leh pa thurawn aiin midang thurawn ngaichang an tam zawk tih hmuhchhuah a ni bawk. Thalai mipat hmeichhiatna hmang tawh zingah hian rawlthar (mipa) 17% leh tleirawl (hmeichhia) 22%-te nu leh pa thurawn ngaichang thin an nih laiin, rawlthar 40% lai leh tleirawl 38% lai chu nu leh pa aia midang ngaihdan ring zawk a nih thu sawi a ni.
Nu-ho zawhna an zawh zinga 78% lai chuan an fa-te hian an thu aia an thiante thu an zawm zawk an lo rin thin thu an sawi a; hetiang a nih avang hian an fate hi thu tha hrilh vak pawh sawt mang lova an lo ngaih thin thu sawiin, tam tak chu an lo beidawn ruk thu sawi a ni bawk.
Hetiang ngaihdan hi vantlangin thu dik awmsa ang hiala an ngaih vang hian, researh beitu Jean-Yves Frappier-in research a beih dawn pawhin medical field-a a thawpui tam takte chuan a zirchianna chu thil sawt lo leh awmze nei lo ang hialin an lo ngaih sak hial a. Mahse a thil hmuchhuah hian ngaihdan ding lai hi a lehthal chiang hle a ni.
Thalaite hi an hawiher-ah mi luhlul, nu leh pa laka hel fo thin leh, an thu pawh zawm tha duh mang lo angin lang mahse, nu leh pate’n theih ang tawk tawka thu tha an lo hrilh thin hian sawtna chin a lo nei teh meuh mai tih he research atang hian a lang chiang hle a.
Nu leh pate hi thalai enkawl chungchangah an lo pawimawh hle tih a lang a; zawldawh taka an fate an zilhhau peih phawt chuan an fate hian an ruk takin an thu leh hla tha chu an lo ngaipawhmawh nge nge ber a lo ni, tih a lang bawk awm e.
