SIAMTHAT A NGAI
Kan ram hun tawng chhoh leh dinhmun hi i chhut ve ngai em? Sum tlemte beisei vanga tualthah, inrawk, inrukbo, insuam leh inbumna thil thleng hriat tur a tam chho ta hle mai. Hei hi engvangnge ni ang le?
Mizote hian vanneihna tak mai kan nei kan ti thin. Khawvel boruak dangin min chim tak tak hmain kan ramah Kristianna a lo lut hma hlauh hi a ni. Chu Kristianna chuan min phuar tlata hriatna kan nei a, pawi liantham leh rapthlak lutuk khawih lo turin min zirtir bawk. Hei hian min veng hram hram chung pawhin kan rama thil thleng thin tam chu kan hmuin kan hre theuh awm e. Sualna hian kian lam aichuan pun chhoh lam a pan zel zawng a nih hi.
Mi tupawh mai hian rualpawl tawka khawsa thei nih kan duh theuh mai. |henkhat chuan chumi chang tur chuan a beih pawh an bei nasa. Mahse kan tun dinhmunah hi chuan a thawkrim leh hah apiang an rethei ting ni mai hian a lang bawk si, buaithlak tak zawng a ni. Vawikhat pian manah tupawh hian dinchhuah a, mi awmthei nih kan chak theuh si. Chuvang chu ni hmiang phalloh leh khap a ni tih hrereng chung pawhin zu leh ruihtheih thildang zuar tawk pawh kan awm reng ni, hlawk tlat hek le.
Hnathawh uar tur leh taima turin kan infuih chamchi a, rim taka thawk turin kan inzirtir bawk. Dinchhuahpui mi thenkhat awm bawk mahse, a nawlpuiin kan tih theih kut hnathawh hian min khai chhuak zo mawlh si lo. Rualpawl tawk ni tur chuan sum tih tham deuh lakluh a lo ngai a. Kawng awmchhun ni maia lang sorkar hnaa luh tumin mawi leh mawilo pawh thlu phal lovin thuneitute kan intlawnsiak mai zawng anih hi. Sorkar a lut ve theilo tan zawng khua a var lovin hmalam hun zawng a thim teh zawng anih hi.
Kan kalphung leh hmalak dan hi chu siamthat zawng a ngai chiang a ni. Kut hnathawktute tan hamthatna, an thawhrah hlawk zawka an tel theihna turte, thawkrim apiang an hlawk theihna tur te, hna hahdam leh thawk tlem zawk ten hlawh tlem zawk an hmuh theihna turte a kan in her danglam deuh chu a ngai a ni. Sorkar hna chauh hi dinchhuahna a nilo ti ngam tur khawpa kut hnathawh leh thildang hi dinchhuahpui theih ngei tur a ruahmanna kan siam zawng a ngai chiang mai.
Zoram hmasawnna ngaihtuahtu pawl YMA kan nih ang ngeiin a mei zang hlaptu ber kan nih pawh hi a tul awm mang e. Sorkarin hmachhawp leh kalphung thar a duang thin a, hengahte hian thurawn kan pek a tul awm e. Kan ramah mithiam tak tak kan nei a, hman tangkai pawh a tha ngei ang. Kan ram thil thar chhuah leh awmsa te hlawk zawka hman leh tihral dan ngaihtuah a hun takzet bawk. Chutiang kan ti thei anih chuan tunai hian kan dehchhuah a pung ang a, mipuiin hlawkna kan tel tam sawt bawk ang. Diklo pawisa hauh lova sorkar hnaa luh tuma inchuh buai a ngai tawh hek lovang. Chutih hunah chuan roreltu tan pawh dikna kenkawh hi a awlsam zaih tawh ngei ang.
