Nang i hmunah kei ka hmunah
- MARYMA Editorial, 26.03.2011
Ramhlun North, Aizawl veng lian pawl tak hi a chenga te pawhin kan in hria a niang, YMA a ni emaw veng hminga inelna a awm reng reng in ‘veng lian kan ni a, kan tel ve ngei tur alawm’ tih hi kan sawi hmasak pawl tak a ni fo awm e, kan result erawh thu dang nise.
Veng a len chuan mi chi hrang hrang, mizia leh thiam lam in ang lo tak tak kan lo tam a, kan theihna pawh a in chen hek lo. Officer lian tak tak kan awm laiin sorkar hna la thawk miah lo chhungkua a awm theih a, hausa tak kan awm laiin nitin hnathawka chhuah ngai pawh kan tam awm e. Taima tak, hnaa tul em em kan awm a, taima lem lo tak, hna hmuh chhun pawh thawh ai chuan chhungte kuta dah thiam tak te pawh kan awm nual awm e. Heng mize hrang hrang leh dinhmun inang lo tak tak te hian Ramhlun North Veng hi kan siam a ni.
Kan thiamna leh theihna a in chen lo ang bawkin veng tana kan tih theih tawk leh kan tih ve tawhte pawh a in ang lo zung awm e. Thlan lai taima em em khan khawhar hla a sa thiam lo mai thei a, thawhlawm thawh tam thei chhungkua kha hnatlan nikhuain an rawn lang ziah lem lo thei bawk. Khawhar in kal taima em em kha kuang siamah chuan a laktlak miah lo thei a, Maryma buaipuia Inrinni leh Sunday zinga buai buai ho hi zaipawl atan chuan a tha ber kan ni lo mai thei. Infiam thei em em, kan veng pawh vawi duailo min lo ti hmingtha tawh tute hi Library enkawl atan chuan a laktlak ber ber te an ni lo mai thei bawk. Sawi tur a tam ang, sawisen chi a ni lo. Kan theihna zawn theuha veng tana tha thawh hi kan tihtur a ni a, kan hai mai bik tur a ni lo. Heng hi a ni kan veng ti nuam a, tihmingtha fo thin tu chu ni.
Kan thiam loh leh theih ve loh lam emaw, kan tui loh na lam anih avang maia sawisel thin kan nih chuan kei mahni hi enge kan nih in enlet fo ila a tha awm e. Tute emaw hming thatna tur lo huphurh a, lo sawisel ching thinte hi khawtlanga mi tangkai tak an ni duhlo khawp mai. Tha thawh thei lo ten a sum lamin tan an la thei a, sum ngah viau mahila hnathawk tu kan mamawh a, tha leh zung thawhchhuak pawl kan awm a. A thenin zaipawl hmangin kan veng an ti hmingtha a, thenkhat ten infiamna leh tlawmngaihna ten kan veng an ti hmingtha bawk a. Lehkha zir sang tak, thiamna lamah pawh Mizorama langpha kan han nei ringawtte hian kan veng hi an chawimawi a ni.
Tichuan, mahni zawnah theih theihtawp chhuah zel in, mi thiltih that leh an theih tawkte in hmuhpui zel i la, kan veng hi a hnung tawlh miah lo ang tih hi hrilhlawkna dawng tan kher lo pawh a sawilawk theihin a rinawm. Sawisel ai chuan fakna thu dawn hi mitinin kan duh zawk theuh si a.
