Vungzaliana (43 yrs) 1991 National Bravery Awardee kan chan ta
- Mamuana
A piannna mual leh hun tawn lamin a zir loh vang te pawh a ni ang e, chiang takin a pian ni leh thla hriat theih a ni lova, a kum erawh kum 1968 kha a ni awm e. Damdawnga (L) leh Ningzadimi (L) te fa 9 zinga a tlum ber ni turin Vungzaliana hi Leisenzo-ah a lo piang a, Zoram buai avangin Aizawl lamah an chhungkua in kum 1971 khan an rawn pem thla a, Ramhlun ah hian a lo seilian ta a ni. Chhungkaw khawsak rel a zia deuh beiseiin Sesih lamah an pem chho a, dt. 22nd March, 2011 (Thawhleh) zan dar 11 khan chatuan ram min lo pansan ta ni. A nupui leh fate 4 a kalsan a, a tuk dt.23rd March 2011 (Nilaini) khan Sesih thlanmualah vuiliam a ni ta.
Kum 1991 Republic Day (26th January), New Delhi-ah khan India rama naupang huaisen, an huaisenna te uluk taka zirchian an nih hnua chawimawina sang ‘National Bravery Award for Children’ chu Indian Council for Child Welfare (ICCW) te kaltlangin India ram President R. Venkatarraman chuan a hlan ani. Hemi tum hian Mizo naupang 2 an tel a, a thianpa hi tuna Ball pet thiam mai baka Coaching lama Zofate zinga sawi hlawh tak Joseph Lalsangzuala (Kanan Veng, Aizawl) hi a ni. Khatih hunlai khan Doordarshan bak en tur la awm ta lo chu an Program neih ang ang te chu hmuhnawm ti takin kan lo en ve thin. Republic Day leh Independence Day te phei chu hmaih kan hlau ve hle thin a ni. Hemi kum pawh hian Sai chunga kawrchung sen ha chunga a chuang en tur khan TV kan lo thlir thap a, second hnih vel chu an rawn tilang ve tain ka hria.
Engvanga he chawimawina hi dawng nge maw anih le?
A kum hmasa 1990 khan tuna Bawngkawn Chhim Veng kan tih tak ah sawn in pakhat a kang hluah hluah maia, mi thahnemngai te’n thelh tumin an bei nasa hle a, a vela lo thlir tawk pawh an ther fur mai. U.Vunga pawh khami kum khan Bawngkawn ah Sikul a kal ve a, hemi tlaia In lo kang ta hluah hluah mai chu va nang vein a thlir mek lai chuan Inchhungah nunna chhan ngai a awm thu an sawi a hre fuh ta hlauh mai. Eng dang sawi ta lo chuan a Ipte ah lai chu a theh thla a inchhung lamah chuan a tlan lut ta nghal a ni. Inchhungah chuan mangang taka lo awm mihring chu a hmu nghal a, tichuan hmun him lamah a pawm chhuak ta nghal a ni. A la duhtawk mai lo, a hnu lawka meipui pui lehzuala la chhuahtir thei tur tuialhthei bur a hmuh bawk chuan a rilru a luah tlat avangin meipui awmna lamah chuan a tlan lut leh a, han thehchhuah mai a tuma mipui an lo punkhawm nasat tawh avangin himin a hre si lo a ngaihtuahna a kal thui hle. Chutia a ngaihtuahna a sen mek lai chuan amah chu a rawn kang ta hlauh mai a, a kawng hnuai lam zawng chuan hliam na tak a tawrh phah ta hial a ni. Hemi avang hian hun rei tak damdawiinah a awm phah nghe nghe.
He a huaisenna leh a inpekna hi ngawih bopui mai chi a nilo tih hretu kan State sawrkar chuan hma la in, Central sawrkar beng a lo thlen hnu chuan thuneitu sang ICCW chuan ‘Vungzaliana hi chawimawi tlak a ni a, khawnge India ram President chawimawina Nopui i dawm tir teh ang u’ tiin ‘National Bravery Award for Children’ chu khatih hun laia President R. Venkattarraman chuan a chennna Rashtrapati Bhavan ah a hlan ta ni.
U Vunga hian a nunah entawn tlak leh hnu chhui tlak a nei lem lo. Mahse, he chawimawina a dawn thu leh dawng tura a beihna te hi chu kan veng mipui te hriat ah ka han tarlang ve a ni. Kan veng mi leh sa ah chuan a dawng hmasaber leh dawng awmchhun a la ni hial awm e.
