FAINA KAWNGAH HMA I SAWN ANG U
Tunlai hian Temple Square i kal tlang a nih chuan Tuikual South Branch YMA ten an vengchhungah faina beihpui an thlak thu leh inzirna chi hrang hrang an puan ri i hre ngei ang. Faina kawnga hetianga hma an la hi an chhuanawm hle a ni. Heng kan benga kan hriatte leh mit a kan hmuhte hi ngaithla liam leh enliam mai lovin faina kawngah hian hmasawn turin i in sang phek teh ang u.
Mizo hi hnam naupangte mahni ila kan duhzawng leh tuizawng a zirin hma kan sawn chak hle a ni. Kan khawpui a thang a, kan thilneihte pawh a changkang tawh hle a ni. Inropui tak tak, lirthei chhuak thar ber ber, technology lamah phei chuan khawl changkang tak tak nen kan rirup tawh a. Thawmhnaw nise a tunlai leh chhuak thar ber berin kan inthuam thei zel bawk. Mahse faina chungchangah hi chuan kan thang hlei theilo zawng anih hi maw!
In ropui leh changkang tak tak bang leh corridor velah te, ‘Bangah chinai tat suh’, ‘I kuhva eina chhak suh’, Hetah zun phal a ni lo’ tih te ziah a la ngai hrih tlat hi chu a zia lo lam deuh a ni. Hetiang a ziak leh tar a ni chung pawh hian bang a kuhva eina sen ngei nguai, chinai tah var liai luai hmuh tur a awm a, tlema hmun thim leh biru deuh laite chu a hing tuau a, zu funna leh eng ilo funna kawr a let rem rum bawk. Kan khawlaiah nise thil eina kawr a thal phengphung bawk a, kan changkan dan hi a la khingbai deuh chu a ni.
Ruahtui a lo tla tam deuh a, kan bawlhhlawh paihruk tuihawkin a rawn len chhuak a. Chu chuan tuihawk luan kawrte a hnawhzui a, tuihawkin luan ngaihna a hriat tak loh avangin kawngdungah leh remchang apiangah a luang zei zui a. Kawng a tichhia a, hmun thenkhatah phei chuan leimin te a awm phah hial a. Chu chuan inchim leh chhiatna dang dang a thlen thin. Chuvangin kan bawlhhlawhte reng reng hi a paihna hmunah chauh i paih thin ang u.
Faina kawngah hian mitin tihtur leh tihawm a awm a, midangin an ngaihthah vang ngawta an tih anga kan ti ve zel a nih chuan a ngaihna a awm lovang. Mi hriat leh hmuhpui kher phut lovin mahni hian ti miah miah mai ila, rah chhuah hun a nei tho tho dawn a ni. Khawlaia bawlhhlawh paih mai mai lohte, zun ina ek lohte kha midang tihloh tur chauh a ni lova, keima tihloh tur pawh a ni tih hria ang u. Kan taksa a fai ang bawkin kan rilru pawh hi fai ve rawh se.
Mizote hi famkimlo taka kan than vak lohnan faina kawng hrang hrang hi hlamchhiah lovang u. Sorkar leh tlawmngai pawl dang kutah faina kenkawh hi nghat mai lo ila, mimal tin ten faina hi i vawng tlat ang u. Faina chungchanga tihawm tak leh tihtur awm zawng zawngte hlen theuh ila, a hlawhtlinna turin bawhzui tha bawk ila, a rah sengtu tur chu keimahni tho hi kan ni si a. Kan in leh a vel, kan veng, kan ram a lo nuam sawt a nga, kan hrisel sawt ngei ang.
