HMEICHHIA IN LA NA ZAWK
Northwestern University, Chicago-a American mithiamte’n an zir a, mipa aiin hmeichhiain hmangaihna an la na zawk a, ngaihzawng te nena inthen chang pawhin mipa aiin an tuar na zawk tih an sawi. Mipa aia hmeichhiain hmangaihna an lak nat zawk nachhan hi sawiin clinical psychologist, traumatologist ni bawk, Dr Seema Hingorrany chuan, “Mipa chuan an rilru kil khatah thil tam tak an hnawhkhawm a, a pawimawh an tih ber kha an ngaihtuah mai thin. Hmeichhia erawhin mipa aiin an thinlung an dah pawimawh zawk. Hmeichhia chu mipaah a innghat nasa hle a, chuvangin inthen pawhin an tuar na zawk a ni,” a ti. Dr Seema Hingorrany chuan inthen tawh ber chuan rilru naa kun rengin awmzia a nei lo niin a sawi. Inthenna tawrh dam theih dan heti hian a sawi:
1. Hring nunah hian engmah hlun tur a awm lo, tih hi pawm la. Mihring kan danglam thin ang bawkin inhmangaihna pawh a danglam thei tih pawm thiam tur a ni.
2. In inthenna ser a la reh hma chuan serious deuh taka kawp tur melh rih suh.
3. Midang tih dik loh, famkim loh leh thiam loh vangin i hlimna leh nun nuam i tihna te paih bo mai suh.
4. Kawppui te laka beiseina tih san lutuk hian inthenna a thlen chawk a, chuvangin i kawppui nen rei tak inkawp i duh chuan a lakah i beiseina tisang lutuk suh.
5. Chu hmangaihna avanga i tawrhna ringawt ngaihtuah lovin, a tih hlim dan che pawh ngaihtuah ang che.
