LAST FRIDAY NIGHT (TGIF) By BCha
Hmeichhe hmai bial lam, mitmeng lian tha kel kawl, sap a ni tih hriat fahrana ngo vang mai, Mizo ten ria-chawm-bat kan tih ang chi, duhawm phuk mai a ni a, a hming chu Katy Perry. A album ‘Teenage Dream’-a hla hit ‘Last Friday Night (T.G.I.F)’ hi nalh ka ti ve tlat!
Mahse, Katy Perry ‘Last Friday Night (Thank God It’s Friday)’ chungchang sawi ka tum lo, keima ‘Last Friday Night (Thank God It’s Facebook)’ zawk a nia ka phûl pui dawm. Last friday night ka ti tak nain, second last friday night a ni tawh zawk mah.
Ramhlun North-a thu leh hla lama ril riaua inhriatna nei, chutiang mi ten zanriah kil hoin titi an seprawtui thin tih hre ve a, mi ril ni a an hriat te awmdan anga awm ve chak Lalruatliana Hmar (Pateruata), K Lalenghluna (KL Hluna), Lalengzami (Ezet-i) leh John Lalhruaitluanga ten Facebook kaltlangin Zirtawpni zana kan ina zanriah kil ho an han rawt tak tak mai chu, zanriah ei turin sawm ta lo ila, ka zah ngawih ngawihna turin an awm thiam nia! A ei dawn tak takah phei chuan F. Vanlalrochana leh Remruata Renthlei kan la rin lutta deuh deuh.
Tichuan le, Facebook-ah ka kâ ka lo âng ve tawh laklawh si a, kan nu hnenah application kan tehlut ta poh a, ani lahin a hming a pu zo thin ngang mai. Hetianga, nui sâng chunga application ka siam tawh chuan Aremi tih takah ‘a-rem-e’ a lo tih thei zel mai hi ka chhuang a nia. Malis taimak deuh erawh a tul thin mai pawh a!
Keini tehlul chuan kan nitin chawhmeh pangngai bak Zirtawpni tlaiah te chuan hmeh pui vak ngaihna awm hek lo le, kan chawhmeh thin pangngai kan siam tam deuh ringawt a, arsa leh vawksa ei thei lo an awm lo hlauh a, “Kan puar e,” chu an ti ve kha.
Facebook kaltlanga ka ina zanriah ka kil puite hi han bihchiang teh. Khawvel thila hlawkna min pe let thei tur an vâng ve teh a nia. Mi thenkhat chaweia insawm chu kan an loh hmel.
KL Hluna hi chuan a dawra thawmhnaw ka lei hunah min tlawm deuh mahna, mahse, engang pawn min tlawm se hlawkna a la nei tho ang!
John-tea ve thung hi. Naupang inti fing, Synod hnuaia thawk lehnghal a nia, engmah beisei lo law law ang, an nu MJS-ah a tling ta hlauh te a nih leh thubuai hlabuai neih hunah tangkaina mual mual te a nei mahna. E, taka John-tea hi chu ka nupui neih ni khan Kohhran zaipawlah a tel tak e.
Pateruata lah chu, a u hi Minister a nia, han ti mawi ve viau dawn mah ila, an chhungkua pawhin Minister hi an chhawr pha meuh lo a nih hmel sia!
Rochana ve hi le. Pastor fapa a ni bawka, kumthar rawngbawltu ruat hunah a tangkai thei deuh ang, han ti dawn ila, amah tak zawk pawh hi a pa zilhna dawng ngun ngun a lo ni reng thei tlat!
A hmeichhe awmchhun Ezet-i lahin a khat tawkin a lo kalh fek fek ang che.
Ka zanriah kilpui te hi ka thiantha tak te an nih dawn hi ka ti ta!
Tichuan le, mi thatna leh felna aia an tlin lohna leh chhiatna lai sawitur hre zawk thalh mai kan thu khawm a nia, tu tu te emaw chu khawsik ur ur na thamin an chanchin te pawh kan sawi ta ve ang!
Mahsela, an chanchin kan sawi turte tana vanneih thlak takin, KL Hluna kha a uipa chithlah tir tumin tu ten emaw an uinu an rawn hruai hlauh maia, a sum ngah ber leh nui ring ber haw a tul tak miauah chuan rin aia hmain kan in mangtha tlang ta law law a nih kha. KL Hluna hi amah aiin a uipa a luck zawk e, an tih tlat chu!
Kar tluangin hah leh rim takin kan thawka, Katy Perry-i’n ‘Thank God It’s Friday’ a ti pawh hi a awm ve viau a nia. Keini pawhin Facebook kaltlanga Zirtawp zan zanriah kilhona tur zawn dapchawp hi bansan kan tum hmel si loh a ‘Last Friday Night (Thank God It’s Facebook)’ kan la ti dawn chauh ni te pawhin a lang!
