I THINURNA NIIN TLAKPUI SUH SE
I nu leh pa emaw chhung leh khat ten an zilhhau che avangin i thinur em? Thenawm khawveng emaw thiante’n an nuihzat vang che in i thinur viau em? Mihring kan nih chhung hian tu mai pawh hian thinurna hi kan tawng theuh tawh awm e. Mihring mizia a kan lungawilohna, rilrem loh zawng leh lawmlohna lo langchhuak thin hi thinurna chu a ni ber a. Thinurna hi chhawr tangkai leh hman thiam chuan hlawhtlinna, thuneihna leh mi chunga leng khawpin min siam theih laiin thenkhat tan erawh mi nuihzat, thenrual tha hnar botu leh chhungkua tidarhtu a chang thin.
Mihring mizia a zir leh thup thiam leh thiamloh a zirte, a nasat leh nasat loh dan a zirin a lanchhuah dan pawh a danglam thei. Zaidam kan tihte pawh hian an thinurna an thup thei a ni tlangpui a, thinchhia tia kan sawite hi nasa taka lanchhuah tirtu te mai an ni. Ngam zawng leh cho loh zawngahte kan lanchhuahtir dan a dang fo va, chhungte, thiante leh ngaihzawngte lakah chuan danglam tak a ni. Kan mizia tehna tha tak mai chu thinurna hi a ni awm e. Thinurna chang hrelo chu mi pangngai zatlo leh mi â nihna a nih laiin a thup thiam leh thinur duhlo chu mifing nih hlawhna a ni. Thil thleng thuhmun rengah pawh kan inlaichinna leh inkungkaih dan a zirin kan thinur danphung pawh a danglam thin. Chutih rualin kan inlaichinna leh inhmangaihna nasat ang zelin thinurna hi a nep thei bawk.
‘I thinurna ni in tlakpui suh se’ tiin kan Pathian lehkhabu thianghlimah kan hmu a. Pathian meuh pawh thinurna lakah a fihlim lo a ni tih leh a fapa Isua Krista pawh a fihlim biklo a ni tih kan hmu bawk. Pathian zia kan kaichhawn ve ni mai awmin lang mahse amah kan an theih lohna chhan chu thinurna hi a ni tlat si. Pathian nena hlimtaka Eden huan a lengdun thinte hnawhchhuah tirtu chu he thinurna hi a ni. Mihringte hi kan dawhtheihna in a tlin loh avanga kan thinur anih pawhin kan thinrimna chuan ni tlakpui lo turin min zirtir a ni.
Thinurna hi awm ta miah lo se kan khawvel hi a nuam sawt in i ring em? A rinawm lem loh a ni. Mi dangte tana pawi leh thalo tih leh sawite kan hrehlo sawt anga, mi tupawh kan chungah engtiang pawhin awm se kan sepui ruah tawrh chawrh chawrh mai dawn a ni. Thinur ngai hauhlo nise kan Pathian pawh hi kan tih in kan hlau lovang a, sual kawng kan zawh san mai awm e. He thinurna hian mihringte min inremtir a, min phuar khawm lek a lo ni. Mitmei inven tawnna te, kan thilneihte humhimtu a lo ni zawk.
Thinurna hi hman thiam leh thunun thiam hi a pawimawh hle a ni. A hun leh hmun hriat hi mifing, mi zahawm leh roreltu tha nihna a ni. Thenawm khawvengte nena in remna, chhungkaw nun hlimawm chen theihna, entawn tlak leh awhawm nun min neihtirtu chu thinurna kan thunun thiam dan a zir ani ang. Chuvangin mahni inhneh hmasak phawt hi a pawimawh ber ani tih hriaiin thinurna hi in hneh tir ngai suh ang che. Eng thilah pawh i thinur anih pawhin ni in tlakpui ngai suh se.
